Polling Party training neiin Vote thlak tan a ni

Karleh Thawhlehni-a Assembly Inthlanpui neih tura Serchhip District-a Polling Party te tana training tum hnihna chu nimin khan neih tan niin inthlan ni-a Duty turte hian Postal Ballot hmangin Vote an thlak tan nghal bawk.
Serchhip District chhung Assembly Bial pathum-a Polling Party turte tana Training tum hnihna hi nimin khan Govt. Serchhip College-ah neih niin Presiding Officer (PRO) leh Assistant PRO (APRO) tan training hi neih a ni a, tun tum inthlanpui neih turah hian Serchhip District chhunga Polling Station 88 bakah thlaveng a awm tur Polling Party 19, a vaiin Polling Party 107 ruahman a ni a, heng Polling Party a PRO leh APRO te hian nimin khan training hi neiin inthlan ni-a an tih tur hrang hrangte zirtir an ni a, Vawiin hian Polling Party tin-a Polling Official te tan Training tum hnihna hi neih ve leh tur a ni dawn a ni.

Nimin-a PRO leh APRO te tana Training neih a nih rual hian heng mite tan hian Postal Ballot hmanga Vote thlakna hun hawn nghal a ni a, CEO Mizoram thuchhuah in a tarlan danin Serchhip District-a Inthlanni-a Duty turte tan hian niminpiah khan Postal Ballot hi pekchhuah a ni a, tunkar Inrinni thleng khian Vote hi an thlak thei dawn a ni.