MNF dinchampha lawmna Mizo Hnam Run-ah nei

MNF dinchampha vawi 62-na lawmna chu nimin (Oct. 23, 2023) khan Aizawl a Mizo Hnam Run-ah neih a ni a, he hunah hian MNF President Zoramthanga chuan thu a sawi a ni.

MNF dinchampha lawmna hunah hian MNF President chuan MNF chu mi tlawm te te in October ni 22, 2961-ah Laldenga In, Tuikhuahtlang-a an din a nih thu sawiin, “MNF hi Pathian in ropui taka ram hruai tura a duan a ni mai lo a, hreawm tam tak tuar tura a duan a ni. MNF Party hian hreawm tam tak a tuar reng a, rambuai, inkah, President Rule puan hnan leh thil tam tak a tuar a. Chuti chung chuan India rama party hlun leh nghet ber pawl ni turin kum 62 zet Pathian in a hruai ta a ni,” a ti a. “Pathian leh kan ram tan he Party hian hmalam a pan zel dawn a ni,” a ti bawk.

MNF President leh Chief Minister Zoramthanga chuan kan unau Myanmar leh Bangladesh lama rawn raltlante chu thawn kir tura Central sawrkar-in an ti chungin an hum tlat tih sawiin, Central sawrkar thu zawm lovin an hum tlat zel dawn tih a sawi a. “Assam ramri atanga Mizo Police inhnuklet tura tih kan nih pawhin, 'CM atanga kan ban a ngai ang,' tiin ka chhang a, min nawr zui ngam ta lo,” a ti bawk a. MNF boruak a tha chho zel tih pawh sawiin, “Hmun hrang hrangah nationalism thlipui a thleh thar leh mek a, MNF-in lawmluh kan nei nasa hle a. Kan bial-ah phei chuan lawmluh tur a inkahpupchaw nasa hle. MNF hi Pathian in kawng laklawhah min kalsan lovang, sawrkar tura kan mamawh tawk MLA min pe ngei ang,” a ti bawk.