Ke-a kal ngai ah kawng laih tlang hman beisei

Mizoram Chief Electoral Officer (CEO) Madhup Vyas chuan Inthlanpui neih turah inthlan buaipuitute ke-a an kal ngaihna Polling Station 22 chu inthlan buaipuitute an intirhchhuah hma ngeia lirthei kaltlang theiha siam a nih a beisei thu a sawi.

Akashvani Aizawl zawhna chhangin CEO Madhup Vyas chuan lirthei a kal theih loh Polling Station 22-te lirthei a kal theiha siam tur hian hetiang awmna bialtu Bawrhsap te chu PWD nena kawng sial tlang tura hrilh an ni tih sawiin, PWD hnathawkte hian theihtawp chhuahin an siam mek a, inthlan vote thlak hun hma a siam tlang theih vek an inbeisei tih a sawi a. Hetianga lirthei kal theih lohna thinte hi Lunglei District-ah Polling Station 11, Mamit District-ah 6 leh Lawngtlai District-ah 5-te a ni a. A vai hian Myanmar leh Bangladesh ramri depa awmte deuh vek a ni a. Tunah hian sawrkar Department hian chak takin hma an la mek a ni.

Hetihlai hian Mizoram-a khaw 19 chu Lawng hmanga tlawhpawh ngai ni ve thungin, heng zinga khaw 6 phei chu Thal laiah pawh Lawng hmang tho a kal ngei ngei ngai an ni a. He’ng khua te hi Lunglei, Lawngtlai leh Mamit District a mi te vek an ni bawk a. Lunglei District-a West Tuipui bial-a khaw 10 leh Thorang bial-a khaw 4-te chu Lawng hmanga tlawhpawh ngai a ni a. Lawngtlai West bial-a khaw pali leh Mamit bial-a khaw pakhat te pawh Lawng hmanga tlawhpawh ngai a ni a. Thal lai pawha Lawng hmanga kal ngaite chu West Tuipui bial chhunga khaw 3, Thorang bial chhunga khaw 2 leh Mamit bial chhunga khaw 1 te a ni.