Serchhip Bial malsawmna dawhthleng ni turin hmanrua atan ka inpe - BJP Candidate

Mizoram Assembly Inthlanpui neih tura Serchhip Bial-a BJP Candidate K. Vanlalruati chuan nakum a Parliament inthlanpui lo awm turah BJP kaihhruai NDA bawkin sawrkarna a siam leh dawn tih a chiang nia sawiin, chumi atan chuan Serchhip Bial malsawmna dawhthleng ni turin hmanrua atan a inpe tih a sawi.

Inrinni khan Serchhip Press Club-ah Serchhip Bial-a BJP Candidate K. Vanlalruati hian thuthar thehdarhtute kawmin kumin Assembly Inthlanpui neih turah hian an Party (BJP) an chet tlai thu sawiin, a khingpui tur ten ngawrh taka Campaign an kalpui hnu Oct. 18 khan Serchhip Bial-ah a ding dawn tih a hriat chauh thu leh an party-in Mizoram mipuite hnena an thutiam 'Vision Document' pawh Zirtawpni khan an tlangzarh chauh thu a sawi a. Mizoram-a BJP mai bakah Central lama an hruaitute duhsakna pawh tam tak a dawn thu sawiin, thlantlin a lo nih chuan Serchhip bial tana malsawmna thlen thei khawpa duhsakna a dawn tur thu a sawi a. “Nakuma Parliament inthlanpui lo awm turah hian BJP kaihhruai NDA bawkin sawrkarna a siam leh dawn tih a chian avangin Serchhip bial malsawmna dawhthleng ni turin hmanrua atan ka inpe a ni,” a ti a. “Mizoram sawrkarin sum harsatna namen lo a tawh thu hi kan CM zahawm tak pawhin a sawi chamchi a, BJP hi sawrkara kan tel ve chuan he harsatna sukiang tur pawh hian ka tangkai ve ngei ka ring,” a ti bawk.

BJP Candidate chuan an party Manifesto, Vision Document-ah chuan Mizoram sawrkara BJP a tel ve chuan PM Kissan hnuaiah lo leh huan neitu (farmer)-te Rs. 6000/- pek thin chu thlatin Rs 8,000/- pek an tiam tih sawiin, Mizorama kuthnathawktu (lo leh huan neitute) chawikanna atan Mizoram Agri-Infra Mission dinin hemi atan hian cheng vbc. 1,000 an ruahman dawn tih a sawi a. MNF sawrkarin SEDP sum a hman dik loh dan an hriatchian thu leh sawrkar ah an tel a nih chuan hemi chungchang chhui tur hian Special Investigation Team (SIT) din a ni ang tih a sawi a, “Tun Sawrkarin mipui sum a enkawl dan dik lo mipuiin an hriat theihna atan thudik puanchhuahna, 'White Paper' kan buatsaih bawk ang,” a ti.

Mizoram sawrkar in Health Care Scheme a kalpui dan chungchang pawh BJP Candidate chuan sawiin, “Sawrkar hnathawk ve lote'n kan damloh a kan inenkawlna tur atana he ruahmanna hnuaia sum kan thawhkhawm chu hnathawk hlawh ilovah an hmang fai vek a, mi rethei damlo inenkawlna senso hi cheng vbc. 74 chuang a bat sak mek a nih hi,” tiin “Kan Party (BJP) hi sawrkarna kan tel phawt chuan, Aysushman Bharat ruahmanna hnuaiah cheng nuai 10 theuh chhungkaw tinin damloh nikhua a inenkawina turin kan dawng thei dawn a Mizoram Health Infrastructure Fund atan cheng vbc. 500 dahin bul kan tan ang,” tiin Falkawn-a Zoram Medical College chu Regional Institute of Medical Sciences-ah hlangkai-in sawrkar laipui-in a inrelbawlna sum zawng zawng a tum tur thu a sawi bawk.

Heng bakah hian chhungkaw tin ‘Lotus Family Identity Card’ pek an nih tur thu te, In luah man tlawm, chatlak lova Electric pek leh tuidawt hmanga In tin tuipek chu ngaih pawimawh hmasak a nih tur thu a sawi a. Zirlaite hnenah a pung awm lovin an lehkha zir chhunzawm theihna atan cheng nuai 10 thleng 'short term loan' pek bakah chhungkaw tin tan sawrkar leh mimal hna pek an tum thu a sawi bawk a ni.

Kumin Mizoram Inthlanpui ah hian Party mal-a sawrkar siam thei an awm dawn lo tih chu mipui thlir dan a nih thu pawh BJP Candidate chuan sawiin, BJP chu sawrkar siamtute zingah tel ngei an tum thu a sawi a. “Opposition MLA ka lo ni a nih pawhin Central-ah BJP a la sawrkar chhunzawm dawn miau avangin ruling MLA bial emaw, CM bial emaw aia pawha hmasawnna thlen tir theitu ka ni dawn,” a ti bawk a ni.