Nomination File mi za aiin an tam tawh

Mizoram Assembly Inthlanpui neih tur chuh tura hming pelut chu nimin thleng khan mi za an tling tawh.

Thla thar November 7-a Mizoram Assembly Inthlanpui neih tura chuh tuma hming pelut te hi hriat theih chinah nimin tlai thleng khan mi 101 an tling tawh a, inthlanna chuh tuma hming pelut hi Aizawl District-ah mi 20; Lunglei District-ah mi 12; Siaha District-ah 1; Champhai District-ah 7; Kolasib District-ah 6; Serchhip District-ah 9; Lawngtlai District-ah 4; Mamit District-ah 8; Saitual District-ah 6; Khawzawl District-ah 2 leh Hnahthial District-ah 3 an awm a. Tunkar Thawhtanni atang khan hming pelut hi an lo awm tawh a ni.

Nimin-a Inthlan chuh tuma hming pelut zingah hian ZPM atangin an Leader Lalduhoma bakah Working President K. Sapdanga te an tel a. MPCC atangin an President Lalsawta bakah Sr. Vice President Lal Thanzara leh Vice President Lalnunmawia Chuaungo te an tel bawk a. Rorellai MNF atangin an Adviser Dr. R. Lalthangliana leh Rajya Sabha MP nilai K. Vanlalvena te an tel a. MNF President Zoramthanga chuan Vawiin hian a bial ngai chuh turin Nomination a File ve dawn a ni.

Tarlan tawh angin Assembly Inthlan chuh tum te tana hming pekluh hun hi tun thla ni 13 atang khan hawn niin Vawiin tlai dar 3:00 thlengin hming pekluh theih a ni dawn a, heng te hi naktuk-ah RO te kaihhruaiin endik nghal a ni dawn a ni.