AIR leh DDK-ah Pol. Party ten thu sawi leh dawn

Mizoram Assembly Inthlanpui neih turah National leh State Recognised Party-ten Sawrkar Media, Doordarshan (DDK) leh Akashvani (AIR) kaltlanga hun an hman dan tur chungchangah ruahmanna siam a ni.

Hemi chungchang hi nimin khan Addl. Chief Electoral Officer H.Lianzela hovin ICT Conference Hall-ah sawiho niin Sawrkar ruahmanna in National leh State Recognised Party-te tan inthlan hun chhunga Sawrkar Media DDK leh Akashvani kaltlanga party thu leh hla, ECI inkaihhruaina te zawm chunga chhuah tura hmalak a nih thu Addl. CEO chuan a sawi a. Electronic Media kaltlanga Political Advertisement pe tur ten Media Monitoring and Control Committee (MCMC) atanga Pre-Certification an tih zel a tul thu leh vote thlak zawhfel hun bituk darkar atanga chhiarleta darkar 48 chhung 'silent period' ah Campaign kaihhnawih tihchhuah phal loh a nih thu a sawi bawk.

Hei bakah hian Addl. CEO chuan he huna kalkhawmte chu vote tla a that theih nan mipuite zirtirna tam zawk pe tura chahin, kum 80 chin chunglam leh Vohbik 40% disability neite zinga In lama vote thlak (home voting) duh an awm a, an dil bawk chuan ruahman sak an ni dawn a, hmun danga lehkha zirte'n vote thlak an ngaih pawimawh theih nan leh India rama vote tlak thatna ber ni tura tan lak tlan a pawimawh thu a sawi a. Vote thlak ni November ni 7, 2023 chu sawrkar hnathawkte bakah mimal sumdawng emaw hnuaia thawk neite tan hlawh kiam chuang lova chawlh, ‘Paid Holiday’ ah Sawrkarin a puan thu tarlangin, hei hian mimal in hnathawka an chhawr/awmpuite pawh huam vekin vote thlak tura an haw laia hlawh pawh pek ngei ngei tur a ni tih a sawi bawk.

He hunah hian Recognised political party-te chu Sawrkar laipuiin a ngaih pawimawh leh a thlawn liau liaua ruahmanna a siam chu ngai pawimawh tur leh a tihlawhtlingtu nih tum tura chah an ni a. DDK leh Akashvani kaltlanga an thu leh hla tihchhuah turah ram dang rorelna sawiselna, hnam, chibil leh sakhua anga inhuatna chawk chhuak thei thil te, hming hmerha mi dang beihna leh tawngkam mawi lo hman te, tharum thawhna lam hawi leh Court thutlukna kalh zawngte dah lo tur te, President, Judiciary leh ramhimna chungchang hmer tel lo turte leh ram inpumkhatna tichhe thei zawng tihlan a rem loh thu hrilh an ni.

An thu leh hla record turte chu tih chhuah a nih hmain uluk taka endik phawt a nih dawn thu tarlan niin Recognised party-te thu leh hla hi DDK-ah chuan October ni 27, 2023 zan atanga November ni 4, 2023 thleng pekchhuah tur a ni a, zan dar 7:00 atang zelin chhuah thin a ni ang. Akashvani/AIR ah chuan October ni 26, 2023 atangin zing dar 7:00 atanga zan dar 8:00 inkarah a chhuak thin anga, tun thla ni 25 atangin Recording tih tan tur a ni ang.

Comments

Popular News (Last 30 Days)

LPG man bithliah thar