Serchhip District-a Home Voting-ah Vote nei 174 zingah mi 168 in Vote an thlak

Serchhip District chhunga kum upa leh rualbanlote tana Vote thlakna hun ruahman an Vote thlak thei mi 174 zingah mi 168 ten Vote an thlak.
Election Commission of India in ruahmanna a lo siam tawh angin Absentee Voters Senior Citizens (AVSC), kum 80 chunglam Vote nei In lama Vote thlak theite leh Absentee Voters in the Category of Persons with Disabilities (AVPD) kum 80 chunglam leh pianphung-a rualbanlo, vote thlak tura Polling Booth-a kal harsatte tan hian In lam-a vote thlak theihna, Home Voting hi Ningani leh Zirtawpni khan Serchhip District chhunga Assembly Bial pathum ah neih a ni a, Serchhip Bial-ah Team pali, Tuikum Bial-ah Team pahnih leh Hrangturzo Bial-ah Team pakhat ten heng In lama Vote thlak thei te hi kal chilhin Vote an thlak tir a, mi 174 zinga mi 168 ten Vote hi an thlak a ni.

Election-a thawktute hnen atanga thu kan dawn danin 26-Serchhip (ST) AC-ah hian In lama Vote thlak thei mi 119 awmin mi 115 ten Vote an thlak a, 27-Tuikum (ST) AC-ah Vote thlak thei mi 30 awmah mi 28 ten Vote hi thlakin 28-Hrangturzo (ST) AC-a Vote thlak thei mi 25 te chuan Vote an thlak vek a ni.

Election Commission of India in kumin a ruahmanna a siam angin Absentee Voters in Essential Serives te tan pawh Serchhip District-ah hian nimin khan Postal Ballot pekchhuah a ni bawk a, heng mite tan hian thla thar Nov. 2-4 chhung khian Vote thlak theih a ni dawn bawk a. Polling Official leh Inthlan kaihhnawiha a Duty turte tan pawh nimin vek khan Postal Ballot hi pekchhuah niin Vawiin atanga tunkar chhung zawng hian Vote an thlak thei dawn bawk a ni.

Postal Ballot hmanga Vote thlak turte tan hian District Election Officer leh Returning Officer ten Vote thlakna hmun an siam ah Vote hi thlak tur niin hriatchian duh nei te chuan thuneitute zawhfiah theih reng a ni bawk.