Ni 2 awh Anthurium Festival zawhfel a ni

Reiek Tourist Resort-a ni 2 awh Anthurium Festival 2023 chu Inrinni khan zawhfel niin Chief Secretary Dr. Renu Sharma-i’n chuan he hun hi a hmanpui a ni.

Chief Secretary chuan Best Tourism Village in India, 2023 nihna hauh mektu Reiek khuain Anthurium Festival, 2023 a thleng chu thil inhmeh tak a nih thu sawiin, kum 2006 atanga Anthurium Festival chu hman tan a nih thu leh Tourism Department, Horticulture Department leh Reiek khawtlangin hneh tak leh zo taka an thleng thin chu thil chhinchhiahtlak tak a ni a ti.

Chief Secretary chuan Anthurium Festival chu Mizoram chhung hmun hrang hrang bakah Mizoram pawn lam atanga khualzin hiptu pawimawh tak a ni tawh tih sawiin, Mizo hnam hrang hrang nunphung leh ziarang phochhuah a ni thin chuan Mizo hnam ziarang chawi nun kawngah nasa takin awmzia a nei a ni, a ti a. Mizoram chu khualzinte tan hmun tlawh chakawm tak a ni tih sawiin, India ram State hrang hrang bakah khawvel ram hrang hrangah Tourism Industry chu pawimawh tak, ram economy-ah pawh thawh hlawk tak a ni tih a sawi bawk.

Anthurium Festival-ah hian lâm leh zai bakah infiamna chi hrang hrang entir niin hun tawp lamah mipuite pualin lam leh zai-a hun hman a ni bawk a, mipui thahnem tak an tel a ni.