MPCC in Manifesto an intiamna a ni tih an sawi

Mizoram Pradesh Congress Committee (MPCC) Chief Spokesperson Ronald Sapa Tlau chuan Mizoram inthlanpui lo awm tur atana Congress party in an Manisfesto-a tihtur an ziahchhuah chu an tih ngei ngei tur an tiam a nih thu a sawi.

Nimin-a Aizawl Congress Bhavan-a thuthar thehdarhtute a kawmna ah Ronald Sapa Tlau chuan an Manisfesto chu intiamkamna a ni tih sawiin, intiamkamna a tih nachhan chu tih ngei ngei tura an tiam a nih vang a nih thu a sawi a. An Manifesto chu mithiam rualte nena ngun taka duan a nih thu sawiin, an Party chuan sawrkar tha, langtlang leh eirukna awmlohna din an tum thu a sawi a, chu chu a hmasa ber leh pawimawh ber a nih thu a sawi bawk.

Local leh Village Council chu sum tam zawk leh mawhphurhna tam zawka thawm an tum thu pawh Congress Party Thupuangtu chuan sawiin, Mizoram hmasawnna tura ruhrel pawimawh kawngpui tha, Airport leh Power System te felfai leh tha zawka tih theih an beisei thu a sawi a. Kuthnathawktute tan hlawhtlinna kawl a herchhuah theih nan tang puihna an ruahman thu a sawi bakah Young Mizo Entrepreneurship Programme hmangin thalai nuai khat chuang eizawnna bultanna tur ruahman sak anih tur thu te, damlohna thilah Cashless, pawisa pek lawk ngai lo, damlo ten an damloh hun chhunga enkawlna tha taka an dawn theihna tur, mi pakhat tan cheng nuai 15 ruahmanna Insurance Scheme Coverage an tih sak dawn thu a sawi a ni.

Ronald Sapa Tlau chuan natna khirh tak tak tuar te tan cheng vbc. 5 kumtin dah an tum dawn thu pawh sawiin, Old Age Pension Rs. 2000 bakah LPG connection Rs. 750 a tihhniam a nih tur thu te, Old Pension Scheme sawrkar hnathawkte tana an tih thar leh tur thu leh hmalakna tur dangte a sawi bawk.