Mipui-a Electric Bill to telh telh zawk hrilhfiah an phut thu ZPM in an sawi

ZPM Consultant F. Rodingliana chuan Electric Bill mipui-ah a to telh telh zawk chu mipuite hrilhfiah an phut thu a sawi.

Nimin-a ZPM Chhung Inkhawm neih ah ZPM Consultant F. Rodingliana chuan kan sawrkarin Power-a sum a indaih loh chhan chu chhui chian deuh a ngai nia a hriat thu sawiin, “Kum 2018-2019 chung chauh kha han en ta ila. Mizoram kan siamchhuah ve leh Tuirial HP atanga 12% kan chan nen man lo a kan hmuh ringawt hi Rs. 7,16,84,68,800/- a ni a, hei bakah hian mipuiin Electric bill kan chhunkhawm Rs. 1,67,26,20,000/- vel a ni a, a vaia hemi kum a sawrkarin sum hmuh Rs. 88,41,08,880/- lai a ni a. Hei bakah hian kan Budget atang leh State in cheng tam tamin a la pui bawk si a, heti chung hian mipui ah a man an ti to telh telh zawk hi mipui min hrilhfiah kan phut a ni,” a ti a. India Energy Excange (IEX) atanga Power kan lei dan tlangpui tarlangin, “Kan lei to na ber chu Bonggaigaon a ni a, Rs. 7.18 per Unit-in kan lei a, an lei na to ber mil hian mipuiah min bill ta em ni? Engvangin nge Rs. 7.94 a min bill tih hi keini ang mipui nawlpui tan chuan hriatthiam a har hle a ni,” a ti bawk.

ZPM Consultant chuan Vankal Solar Plant atangin MW 20 kan thar tawh hnuah mipuiin Electric Bill hi kan chawi tam tual tual tih sawiin, “Kan leina in to lam a pan mang si lo a kan tharchhuah lah a tam tual lai a, kumtin mipui min chawi tam tir hi mipui tan chuan hriat  thiam hi a har a ni. Sawrkar hian mipui hi Electric bill hmang hian sum siam nan min hmang zawk em ni tih hi awl tak a ni,” a ti a. ZPM chuan an hmalakna tur an chiang tih pawh sawiin, “Tlawng lui Phase-I 54 MW Lungleng rama kan khuah tum hi power siamna mai bakah Aizawl khawpui in Tui thianghlim kan neih thei nan te, Khualzin hip nan leh Sanghakhawi nan a remchang em em a ni,” tiin MW 70 pe thei tur Mat lui te, Tuichang Phase-I Thiltlang bulah MW 24 leh Phase-II MW 52 bakah Tuivai Phase-I Ngopa bulah MW 100 te a nih thu a sawi a, “Kum 5 chhung hi chuan kan State mamawh hi hi tharchuah hman ngei kan tum a ni,” a ti bawk.

Nimin-a ZPM Chhung Inkhawm hi ZPM General Hqrs. a Upa Committee President Rosiamhnuna chuan kaihruaiin an party President Lalliansawta chuan an Party zawm thar mi 67 a lawmluh thu ZPM thuchhuah chuan an tarlang bawk.