Serchhip Bial-a Independent Candidate Lalawmpuia’n inthlan a chuh chhan a puang

Mizoram Assembly Inthlanpui lo awm tura 26-Serchhip (ST) AC-a Independent Candidate Lalawmpuia Renthlei chuan nimin khan Serchhip-ah thuthar thehdarhtute kawmin Nomination a File chhan leh a ngaih pawimawh te a hrilhfiah.

Serchhip Press Club-a thuthar thehdarhtute a kawmna ah hian Serchhip Hmar Veng-a cheng Lalawmpuia Renthlei chuan kumin MLA inthlanpui a Serchhip Bial tana a lo din ve hi tunhnaia tum chawp chuk chuk a ni lo tih sawiin; “Kan ram leh Hnam-ah Kristianna Politics, Pathian thutak a ram siamthatna a thlen theih nana a tawp thlenga Pathian leh kan ram tana din hi Pathian hma a ka intiamna a ni,” tiin kum 2005 hmalam khan sawrkarna chelhtu party-ah telin mahse rei a inhman loh thu leh a thiam ve loh thu a sawi a. Tisa taka dikna, rinawmna tlang atang chauh ni lovin Pathian thu nena insuihfinin, ram leh Hnam, Kohhran thlenga veina chuan a rilru a luahkhat chho ta tih sawiin, kum 2008-ah a ram veina te auchhuahpui tumin Election chuh tura Nomination Paper a lakchhuah thu leh a ngam tak loh avanga hlawhchhamin kum 2013-ah chuan Serchhip leh Hrangturzo Bial-ah te a din tak thu leh kum 2018-ah chuan a duh ang duh mi mi tam tak an lo chhuah tak thu a sawi bawk a ni.

Lalawmpuia Renthlei chuan Ram chu Lalpa ta a nih thu leh a neitu duh dana rorel a nih theih nan leh Party Politics chu inbumna leh hleih nei taka rorelna, Pathian thu nena inmil pakhatmah awm lohna, chhungkua, Kohhran, khawtlang thendarhtu a nih avangin hetiang hi Serchhip Bial chhung leh Mizoram pumah a thlen tawh loh nana inthlanna ah hian ding a nih thu a sawi a. Zofate (Mizoram) hi Pathian in khawvel tana eng ni tura a thlan a nih thu sawiin, chumi atan chuan Serchhip District hi Mizoram tana hmun pawimawh tur a nih avangin chumi lo buatsaih tur leh hmasawnna rotling tha a thlen theih nan Bial chhung mi ngei hi kan mamawh a nih avanga ding a nih thu te, Lal ram dang, Hindu lal ram-a siam tumna, Bharatiya Janata Party hmanga hmalak mek dodal a, hneh theitu tur Pathian Lalram sawrkar buaipuitu leh autute an nih thu te pawh a sawi bawk.

Hei bakah hian kan ram siamthatna atan Social, Economic & Moral Reform, Land Reform, Administrative Reform leh Political Reform te chu a ngaih pawimawh thu sawiin, Bial chhung tana tihmakmawh nia a ngaih zingah thalaite suattu leh vantlang nun ralti a siamtu ruihhlo leh a kaihhnawih danchah beihpui thlak nghal te; MLA Fund viltu- Village Level Development Committee hmanga hmasawn nana hman thin te a tel a. Tun tum inthlanpui-ah hian Symbol atan ‘Tiang’ a hman dawn thu a sawi bawk.