Lenkawl

Nimin July 30, 2023 (Pathianni) tlai khan Serchhip Dinthar Vengsang-ah chenna In pakhat chimin vanneihthlak takin mihring thi leh hliam an awm lo.

Serchhip District Table Tennis Association (SCCDTTA) chuan Serchhip bialtu MLA Lalduhoma’n kawng hrang hranga hma a lak sakna ah an lawm hle tih an sawi.

Mizoram-a ramhmul damdawi - Panchakarma Therapy hmanga hriatna thazam, (nerve) leh ruh lam tha lo enkawlna awmchhun Integrated Ayush Hospital (IAH), Thenzawl-ah Panchakarma Therapy hmanga enkawl mi 519 an awm tawh.

Baptist Church of Mizoram (BCM) hnuaia Mizoram Thalai Kristian Pawl (MTKP) in ruahmanna a siam angin Inrinni khan Serchhip-a TKP Unit pathum te chuan Plastic tawih thei lo chharfai hnatlang an nei.

Nimin July 30, 2023 (Pathianni) kha Baptist Church of Mizoram (BCM) hnuaia Thalai pawl, Thalai Kristian pawl (TKP) din champha vawi 72-na a ni a, Mizoram-a TKP dinna hmun hrang hrangah ‘Pathian nen lo inrem rawh u’ (II Kor. 5:20) tih thupui hmangin hun hman a ni. TKP Day hi kumin hian Pathianni a nih avangin Tualchhung Kohhran leh TKP Unit ten an remchan angin an hmang a, tawngtai thupui thlanchhuah 6 hmangin tawngtai rualna neih a ni bawk.

Lunglei leh Tlabung inkar NH. 306 siam zawh ala nih loh avanga mipuite harsatna thlirin nimin khan Khawthlangtuipui Group YMA hnuaia NH. 302 Monitoring Committee leh Maxi Cab Welfare hruaitute chu an thukhawm a, Tuichawng leh Sihphir inkarah lirthei tlan hleih theih loh khawpa zawh harsa a la awm nual tih sawiin, henglai hi kawng siamtuten ngai pawi-mawh hmasa se an duh thu leh kawng thawmthat hna thawh dan chu enpui nise an ti bawk.

Tunhnaia Manipur-a buaina kaihhnawih thil chi hrang hrang atanga Mizoram chhuahsantu Meitei chu mi 660 vel an ni tawh nia chhinchhiah a ni a, All Mizoram Manipuri Association chuan Mizoram chhuahsantu Meitei zat hi chiang taka an hriat loh thu sawiin, a tam ber te chu zirlai leh sawrkar hnathawk an nih thu an sawi bawk.

Inrinni kaltaa MNF Nomination Committee thukhawm chuan kumin a Assembly inthlan lo awm turah Rajya Sabha MP nilai K. Vanlalvena chu Aizawl South-I bial-ah an dintir dawn a, tuna he bial-a MLA nilai C. Lalsawivunga nen an in khing dawn niin a lang. MNF Party hian Ser-chhip bial-ah J. Malsawmzuala Vanchhawng leh Hachhek bial-ah Minister nilai Robert Romawia Royte te ding turin an lo ti tawh a, hemi hnu hian Siaha bial-a ding turin MADC-a MDC ni lai HC. Lalmalsawma Zasai, Lawngtlai West-ah LA-DC-a CEM ni lai V. Zirsanga, West Tuipui bial-ah Prova-i, Aizawl North-I bialah Minister ni lai R. Lalzirliana, Aizawl East-II ah B. Lalawmpuii leh Tawi bial-ah Aizawl Mayor Lalrinenga Sailo te chu ding turin an lo tifel tawh bawk a ni.

Mizoram sawrkar hnathawk inzawmkhawm pawl, Federation of Mizoram Government Employees & Workers (FMGE&W) chuan tunhnai khan Chief Minister Zoramthanga hnenah lehkha thehlutin Dearness Allowance (DA) tipung turin an ngen a. March 4, 2023-a DA chungchang Meeting Chief Minister hova neihah July thla hi Central-in DA a tihpun leh hun tur a nih avangin July, 2023-ah sawiho leh nise tiin thu an dah a. July 5, 2023 khan DA sawiho turin Appointment an dil chungin tun thlengin chhanna an la dawng lo niin an sawi a. August chawlhkar hnihna ah hian FMGE&W Executive Meeting koh a ni dawn tih sawiin hemia DA chungchanga thuthar a awm lo a nih chuan hmalak dan tur ngaihtuah a ni dawn tih an sawi bawk.

India rama Sakei awmzat chhinchhiah chu 3,925 niin kum tina an punna zat chu za zela 6.1 a ni. He thu hi Global Tiger Day puala Minister of State for Environment, Forest and Climate Change Ashwini Kumar-a’n Report a tlangzarh ah tarlan a ni a. Nikuma Project Tiger kum 50 tlin lawmna Mysuru-a neihah Prime Minister Modi chuan India-a Sakei awm zat chu a tlem berah 3,167 a ni tih sawiin, hei hi hmun hrang hranga Camera dah atanga lak fuh chhinchhiah an ni, a ti.

Kum 2018-a Tripura atanga Mizorama hruaikir Bru-te awmna khua, Dinthar-ah Vawiin thlengin kawlphetha lakluh a la ni lo.

Mizoram MLA inthlanpui lo awm turah Mizoram People’s Forum (MPF) leh Political Party te thawhona thuthlung chu a pumpuia hman tura pawm a nih tawh laiin House to House Campaign phal loh erawh Inthlan hun puan atanga hman tan turin MPF leh Political Party aiawh kalkhawmten an pawm.

Rangvamual leh Phunchawng Veng-a eizawnna mumal neilo, Zu zawrh leh danin a phalloh te hmanga eizawng thinte chhanchhuahna project chu tha taka kalpui tum a ni.

Mizoram MP C. Lalrosanga (Lok Sabha) leh K. Vanlalvena (Rajya Sabha) te chuan sawrkar lai BJP kaihhruai NDA a tel an ni chungin Forest Conservation Amendment Bill, 2023 chu an duh loh thu leh an dodal thu an sawi.

School Education Minister Lalchhandama Ralte chuan Mizoram tan PM eVIDYA DTH TV Channel pahnih chu Inrinni khan a hawng.

Manipur buaina avanga sahimna zawnga Mizoram-a rawn raltlante enkawlna senso atana Chief Minister Zoramthanga’n sawrkar laipui hnenah cheng vbc. 10 a dil chu ni 67 hnu-ah pawh pek a la ni lo.

India ramchhunga zirna kalphung thar hman tura duan New Education Policy (NEP) chu Mizo-ram-ah pawh thui tak kalpui a ni tawh.

Zoram Peoples Movement (ZPM) Party chuan Term Exam hun thleng pawha zirlai naupang ten zirlaibu an la dawng kim thei lo chu pawi an tih thu an sawi.

Chief Minister Zoramthanga chuan Manipur State chhung inrelbawlna-a inrawlh a puh a nihna chu thu diklo a ni tih sawiin, NGO Coordination Committee-in Aizawl a kawngzawh an huaihawt-a a tel vena chhan chu kha kawngzawh kha Manipur-a remna leh muanna a awm theihna atan leh Manipur Zofate thlavang hauhna a nih vang a ni tih a sawi.

SDFA Season Ending Tournament chu nimin khan zawhfel niin 1st Division-ah FC Serchhip Kawnpui leh 2nd Division-ah Keitum-I te an champion a ni.

Govt. Serchhip College chuan nimin khan ‘Annual Day 2023’ hmangin Academic Session liamtaa an College hmalakna hrang hrangte tarlan a nih bakah kawng hrang hranga an zirlai hlawhtling leh titha thlanchhuahte hnenah lawmman chi hrang hrang sem nghal a ni bawk.

Mizoram sawrkar in cheng nuai 650 senga Govt. Serchhip College Administrative Building sak hna a thawh mek chu nimin khan Serchhip a thuthar thehdarhtu thenkhat te chuan a hmunah an tlawh a, Govt. Serchhip College Principal C. Laldintluanga leh hnathawh viltu ten lo dawng-sawngin hnathawh tawh chin leh hmalak zelna tura an ruahmanna te an lo hrilh a, hnathawktu dah belh an tum thu hna enkawltute chuan an sawi.

Serchhip Mat Phai-a Leilet neittute chuan tunlai hian Leilet-ah buh an phun mek.

Thenzawl SDO (Civil) hna chelh mektu V. Lalmuanpuii MCS chu tunhnai khan Junior Administration Grade-ah kaisangin Project Director DRDO hna chelh turin Khawzawl-ah sawn a ni a, a aiawh tur hi dah la ni lovin Serchhip-a SDO (Sadar) Rebecca Laldinmawii Hrahsel chuan Thenzawl SDO (Civil) hna hi a chelh kawp rih dawn a ni.

Nimin khan Saitual-ah District Disaster Management Authority (DDMA) chuan an Chairman Dr. Lalngura Tlau hovin Manipur atanga sahimna zawnga Saitual District-a lut te tanpuina chungchang an sawiho a, he hunah hian Saitual District khaw 30-ah Manipur atanga sahimna zawnga lut an awm thu leh tun thlengin raltlan mi 2951 an awm tawh thu tarlan a ni a, khawtlang hruaituten enkawl nan sum an sen zat an thehluh belhkhawm chu Rs. 7,98,000 a tling tawh a ni.

Mamit District chhung Vawngawnzo khua-a Mini-Sadbhav Mandap (Multipurpose Community Centre) sak thar chu nimin khan bialtu MLA Er. H. Lalzirliana chuan a hawng a, Aspirational District Programme, NITI Aayog, Govt of India hnuaiah cheng nuai 50 senga sak he Hall thar hi a dung ft. 64 leh a vang ft. 33 niin Bialtu MLA chuan Vawngawnzo khuain Hall tha tak an nei ta chu a lawmpui thu a sawi a, dimdawi thiam tur leh neitu nihna nena enkawl turin a chah bawk.

Mizoram Legislative Assembly dinglai, 8th Mizoram Legislative Assembly-a thutkhawm hnuhnung ber tura ngaih leh thutkhawm vawi 12-na chu thla thar August 22 atanga neih turin Governor Dr. Haribabu Kambamapati chuan a ko a, thutkhawm rei chhung tur leh hun hman dan tur kimchang chu la ruahman tur a ni ang. Tarlan tawh angin Mizoram Legislative Assembly dinglai term hi kumin December 17 khian a tawp dawn a ni.

Kolasib bialtu MLA leh Supply Minister K. Lalrinliana chuan nimin zing khan Kolasib Vengthar-a Urban Health & Wellness Centre chu a tlawh a, Kolasib bial chhung khaw tinah Health Sub-Centre leh SEDP Clinic te din a nih tawh thu a sawi. Urban Health & Wellness Centre hian a tum ber chu Non-Communicable diseases, natna inkaichhawn theih loh heng Zunthlum, BP sang, TB, Oral cancer, Breast cancer, ENT services leh Mental Illness natna tam zel tur ven leh tihtlem a ni a. Nu naupai leh naute vaccine hrang hrang pek pawh huam tir tur a ruahman a ni. Hetiang Urban Health and Wellness Centre hi Mizoram pumah 17 a awm tawh a, Aizawl District-ah 4 leh District tinah pakhat theuh a awm a ni.

State Council of Educational Research and Training (SCERT) Mizoram Director Laldawngliani Chawngthu chuan niminpiah khan SCERT-a Virtual Lab a hawng a, hun rei tak atanga he Virtual Lab hi zirlaite tana an lo awh thin thu sawiin, hawn theiha a awm ta chu lawmawm a tih thu a sawi a. Virtual Lab-ah hian zirlaite hriatthiamna tanpui thei tur 3D animation, a ang thei ang ber tura siam-chhuah, hmun leh hmuna en ang maia hriat theihna pe thei a nih thu a sawi a, he thil hlu tak mai hi Mizoram chhunga zirlaiten tangkai taka an lo hman a duhsak thu leh an zirlai hriatthiamna sang zawk a pek theih dan te leh zirlaite tana hman theih tura hawn a nih thuai tur thu a sawi bawk.

Tlabung leh Lungsen tiamin an chhehvel khaw hrang hranga Maxi Cab service 60 bawr velte'n National Highway 302 zawh ngam loh vanga an service an tihtawp chu nimin thleng khan chhun-zawm ala ni a, Lunglei DC hova thukhawm in kawng chhe zual siamna tura kawngpui khar lailawk hun an siam pawh nimin zing khan tawp mah se Maxi Cab service te chu nimin thleng khan an la chhunzawm lo a ni.

Agriculture Minister C. Lalrinsanga chuan nimin khan Aizawl-a Miliennium Centre inchung zawl-ah loneituten tharchhuah atanga siam thil chi hrang hrang awlsam zawka hralh leh leina hun, IFAD-FOCUS te buatsaih Buyer Seller Meet 2023 chu a telpui.

Transport Minister TJ. Lalnuntluanga chuan Champhai Venglai-a Community Multipurpose Convention Centre sakna tur hmunhma leh hmalak dan turte nimin zing khan enfiahin District Transport Office (DTO) sak mek pawh a tlawh nghal bawk.

Myanmar atanga Mizoram-a raltlan a rawn lut leh Khawbung khuaa awm Hrangthanchea (38) chu tualthah thubuai-ah thiamloh chantir niin damchhung tang tur leh pawisa chawi tura hrem a ni.

Peoples' Conference (PC) Party chuan tunhnaia Supply Minister K. Lalrinliana'n Tuialhthei dahkhawlna (Oil Depot) siamna tura Sairang Sihhmui-ah ram acre 24-a zau cheng nuai 50,000 senna tur atana ruahman siam mek a nih thu a sawi chu lawmawm an tih thu sawiin, chak taka bawhzuia a rang thei ang bera hlenchhuah ngei nise an duh tih an sawi a. Vairengte-a Oil Depot pawh hnuchhawn mai lova tuaihnum tharr turin Minister chu an ngen bawk.

Kolasib District-in kum 25 a tlin lawmna chu nimin khan Kolasib DC Office tual-ah neih niin Kolasib bialtu MLA leh Supply Minister K. Lalrinliana chuan khuallian niin a hmanpui a ni.

ZPM Leader Lalduhoma chuan, “ZPM chuan Party dang te tih dan ang ni lovin Collective Leadership kan kalpui a, Chief Minister leh party President nih kawp a rem ve lo a ni,” a ti.

District Council & Minority Affairs (DC&MA) Minister Robert Romawia Royte hovin nimin khan Mizoram-a Autonomous District Council pathum hotute chuan thutkhawm an nei.

Rural Development Minister Lalruatkima chuan Mizoram Sawrkarin Self-Help Group (SHG) te a ngai pawimawh hle tih sawiin, hamthatna awm thei hrang hrangah SHG member te leh an chhungte duhsak thin an nih thu a sawi.

MNF Sr. Vice President Tawnluia chuan Zofate rorelna pakhat hnuaia awm chu MNF in Champion pui an tum ber a nih thu a sawi.

Cheng nuai 60 chuang senga sak Serchhip Kawnpui VC Hall chu nimin zing khan Serchhip District Bawrhsap kalchhuak tur Nazuk Kumar IAS chuan a hawng a, Hall thar lawmna puala Vantlang Inkhawm nimin chawhnu lama neih chu Addl. DC James Lalnithanga chuan a hmanpui bawk a ni.

Mizoram in kumin kumtawp lama Assembly inthlanpui a hmachhawn tura Serchhip District-a Sector Officers leh Sector Police Officers te tan nimin khan an hnathawh dan tur inzirtirna neih a ni.

Serchhip District Football Association (SDFA) buatsaih Season Ending Tournament chu nimin khan Semi Final khelh zawh niin Vawiin hian Final khelh a ni ang.

State Bank of India (SBI) Serchhip Branch chuan SBI Corporate Social Responsibility Activity hnuaiah nimin khan Govt. Serchhip College a Eco Club leh NSS Unit te nen Govt. Serchhip College Campus-ah thingtiak an phun a, he hunah hian SBI Serchhip Branch-a thawktute bakah Govt. Serchhip College Eco Club Member te, NSS Volunteer te leh Govt. Serchhip College a thawktu ten Colege Girls Hostel leh a chhehvel ah thingtiak thahnem tak an phun a ni.

Thla thar August 15-a Thenzawl-a India Independence Day lawm dan tur ngaihtuahin nimin Thenzawl SDO (Civil) Conference Hall-ah sawrkar leh khawtlang mi pawimawh te an thukhawm a, he thutkhawm hi SDO (C) V. Lalmuanpuii chuan kaihruaiin August 15, 2023 chawhma dar 10:00 ah Lothazawl Playground-ah hman tura ruahman a ni a, SDO (Civil) in Hnam puanzar a pawtparh dawn a ni.

Serchhip District Bawrhsap Nazuk Kumar IAS chu Aizawl District Bawrhsap hna chelh tura sawn a nih hnuah nimin khan a hna thar zawm tur hian a chhuak ta a, Addl. DC James Lalnithanga chuan Bawrhsap mawhphurhna hi a chelh rih ang. Serchhip SP Vanlalnghenga MPS pawh 1st IR Bn. ah Commandant hna chelh tura sawn a nih avangin nimin khan a hna thar chelh tur hian a chhuak bawk a, Addl. SP Saidingliana Sailo chuan SP mawhphurhna hi a chelh rih dawn bawk a ni. Mizoram sawrkar in Serchhip DC leh SP hna chelh tura a ruat thar te chuan karleh khian an hna hi an rawn zawm dawn nia thudawn a ni.

Chhimphei Group YMA chuan Hualngohmun khaw hnuaia kawng chhia chu a rang thei ang bera siamtha turin sawrkar an ngen.

PC Party Vice President Lalrinmawii Fanai chuan Parliament thutkhawm neih mekah ‘Forest Conservation(Amendment) Bill 2023 to North East (FCAB)’ kaltlangpui a ni chu Mizoram tan anchhia a ni tak meuh tih sawiin, an Party chuan an dodal tlat dawn tih a sawi bawk.

Tuipuibari khuaa awm Isak Malsawmzuala (3) chu tunkar Thawhlehni tlai atang khan chin hriatloha awmin Nilaini atang khan khawtlang huapa zawn a ni a, nimin chawhma dar 10:00 vel khan khua atanga meter 300 vela hla a awm lui-ah lung leh lung inkarah a ruang hmuh a ni.

Mizo Students' Union (MSU) General Hqrs. chuan Manipur State-a thil thleng mek avanga Mizo mipuite demna tur zawnga Mizoram chhuahsantute zawng zawng chu a rang thei ang bera an hnathawhna hmuna let vek tura ngenin, sawrkar hnuaia hlawh la Meitei mi Pisa kai lo te chu July 27, 2023 atanga chhiara ni 10 ralhmaa an hna zawm vek tur leh zirna In-a thawktute chu Academic Year tan ruala hna zawm vek turin an hriattir bawk.

Food Civil Supplies & Consumer Affairs Minister K. Lalrinliana hovin nimin khan a Pisa ah IOCL, Railways, Revenue Department, PWD, Power Grid (PGCIL) leh Aizawl DC aiawh ten Oil Depot siam tur chungchang an sawiho a. Oil Depot hi Sihhmui rama siam tur niin, hemi atan hian Acre 24 a zau ram leh a kalpawhna tur atan Acre 7 a zau ram lak tur a hmalak mek a ni a, Rel in a kal pawhna tur hi leiverh a siam tum a ni bawk. Oil Depot-a Rel dinna tur Rail-Siding siamna turte pawh sawiho niin hemi atan hian PWD kawng kal dan siam danglam ngaite, Power Grid ban leh hrui kal dan thlak danglam ngaite leh thlak danglam dan turte sawiho a ni. Oil Depot hi cheng vbc. 500 hu project tur niin, Oil dahkhawlna tur Tank 9 awmin Oil KL 1500 leng tur a ruahman tur a ni.

Nimin khan Chief Minister Zoramthanga hovin CM Conference Hall-ah Laldenga Cultural Centre hna tan thuai dan tur leh Assam Rifle te Zokhawsang lama an insawnchhuahna tur thil pawimawh hrang hrangte rel a ni a, Meeting-ah hian Zokhawsang ram paltlanga loneitute kalkawng tur buatsaih tan a nih thu tarlan niin, AR ram a mimal ram neite chungchang pawh chak taka hmalak chhunzawm zel a nih thu tarlan a ni bawk. Hei bakah hian Union Home Minister-in April ni 1, 2023-a a lung a lo phum tawh Laldenga Cultural Centre hna bul tan thuai a nih theih dan tur sawiho niin Central sawrkar thuneitute nena indawr zui zel dan turte an ngaihtuah a ni.

Nimin khan ‘Safety for domestic employees and other’ tih thupui hmangin India hmarchhak State huap Regional Level Seminar chu Assembly Annexe Conference Hall-ah neih a ni.

Champhai leh Hnahlan-a Grape sawrna hmun ah Grape tui leh Wine siamsa thahnem tak hralh lovin a awm mek.

India in G-20 President hnihna a chelh mek laia programme hrang hrang siam zinga thalai te tinzawna programme siam, Y20 Meet on Nationalism, Patriotism and Development intawhkhawmna chu nimin khan a tum 5-na atan Pachhunga College University (PUC)-ah neih a ni.

Saitual District Hospital chuan Mizoram-a damdawi In te faina lama inelna, Kayakalp 2023-a lawmman pakhatna an lak nimin khan an lawm.

Aizawl Traffic-a Sr. SP chuan The Mizoram Motor Vehicles Rules, 1995 Section 170 in a sawi angin lirthei-ah Mudguard vuah vek tur a nih thu a sawi.

North Eastern Council (NEC) bultuma Art & Culture Department leh MZI Gen. Hqrs. tangkawp buatsaih ‘Zoawi Kut 2023’ chu nimin khan Dawrpui Multipurpose Hall-ah Art & Culture Minister R. Lalzirliana chuan a hawng.

Higher & Technical Education Minister Dr. R. Lalthangliana chuan National Education Policy, 2020 leh RUSA 3.0 in a phut angin State University kan neih theihna turin hma an la nghal tih a sawi.

Serchhip District Football Association (SDFA) buatsaih Season Ending Tournament chu Vawiin hian Semi Final khelh a ni dawn ta.

Serchhip District Information & Public Relations Officer (DIPRO) thar Lalnunmawii MIS chuan MJA Serchhip District Member te a Pisa a leng-ah sawmin nimin khan inkawmna an nei.

MNF Thalai, Mizo National Youth Front (MNYF) Thenzawl bultuma Thenzawl Zone Football Association (TZFA) buatsaih ‘Independence Day Football Tournament 2023’ chu nimin khan Thenzawl-a Lothazawl Playground-ah khelh tan a ni.

Serchhip District Road Protection Squad te chuan tunlai hian Serchhip khawpui chhung Veng hrang hrangah an hmalakna kal mek bawhzui hna an thawk.

Nizan hmasa khan Ngopa Police Team te leh Ngopa VDP te chuan Heroin hawng 11 manin a neitu nia inchhal Johan M. Hnamte (35), Serchhip Saron Veng nia inchhal pawh man nghal a ni. Thudawn danin Ngopa Police Station-a thawktute leh Ngopa VDP te hian nizan hmasa khan Ngopa-a Phalte Peng-ah Joint Operation an nei a, hetah hian Heroin No. 4 Hawng 11, gram 128-a rit chu Johan M. Hnamte (35), Saron Veng, Serchhip nia inchhal kut atangin an man Ngopa Police Station-ah thubuai ziahluh nghal a ni a, hemi kaihhnawih hi chhui zui nghal a ni bawk. Mizoram Police te chuan Ngopa VDP te thlawpna leh thawhpuina ah lawmthu an sawi bawk a ni.

Mara Autonomous District Council (MA-DC) Fur thutkhawm nimin-a chhunzawm ah eptu lam atanga Manipur-a Zohnahthlak te harsatna thleng chungchang sawihona Motion putluh chu Chairman in CCB Rules-ah Session tan hma ni hnih hma lamah Motion hi putluh tur a nih avangin hnawl a nih thu a sawi a. Eptu member te chuan Chairman thuneihna nia sawi ve thungin, lungawi lovin House hi an chhuahsan a ni.

Nimin tlai dar 5:00 vel khan Aizawl Dawr-pui Vengthar-a chhungkaw pahnih te chenna In (Assam Type) chu bungrua engmah chuh hman lohin a kangral a, he In hi Thansangi te In niin kangmei chhuah chhan hi chiang taka hriat theih a ni lo a, mi tlawmngai ten an thelh hnuah Fire & Emergency Services te koin In dang kangkai lovin thelh a ni. In neitu fapa Lalhruaia chuan kangmei thelhna lamah hliam a tuar bawk a ni.

Champhai District chhung Selam atanga Tuisa panna Link Road km 18-a thui MLA Fund, SRDC leh SASCI sum hmanga laih chu nimin khan Champhai North bialtu MLA Dr. ZR. Thiamsanga chuan a hawng a, Selam khaw tana hma an lakna hrang hrangte a tarlang bawk a ni.

NABARD sum cheng nuai 10 leh Samagra Siksha Minor Grant hnuaia Toilet grant cheng nuai 3.5 senga sak Govt. Middle School, Meidum chu nimin khan bialtu MLA leh Supply Minisster K. Lalrinliana chuan a hawng a, zirna In chu zirlai naupangte tana rilru leh ngaihtuahna tuai hriamna hmun, hmunhma nuam leh zirna tih hmasawn nan pawh a hmun rem tak a nih tur thu sawiin, he School building thar pawh hi zirlai naupangte tana thiamna thar an chharchhuahna hmun ni ngei turin duhsakna a hlan bawk. Nimin a hawn tak he School building thar hi kumin Feb. 9 khan sak tan niin MLA Fund hmangin a hmunhma laihzawl hna hi thawh a ni bawk.

AH&Vety Minister Er. Lalrinawma chuan nimin khan Lengpui ram Lawngzawl-a Boar Semen Station chu tlawhin an hmalakna leh an hnathawh hrang hrang a enfiah a, Minister chuan ruahmanna tha leh liantham awm thin mahse hma-sawnna leh rahbi thar hmu tur chuan thawktute leh tualchhung mite nen thawhhona tha neih a, neitu rilru pu chunga hna kan thawh a, kan enkawl zui zel a pawimawh thu a sawi a. Vawkpa chi tha lak leh siamchhuahna hmun tur kan ramah hetiang hmasawnna ruhrel awma kan nei thei tur chu lawmawm a tih thu sawiin, hmasawnna hian intodelhna a thlen ngei a beisei thu a sawi bawk. Nucleus Boar Semen Station hi National Livestock Mission (NLM) hnuaia sak niin Component of Scheme hi Boar Pen, Semen Collecting Cum Laboratory, Site Office, Manager Quarters, Farrowing Pen, Treasure Pen, Changing room, Feed godown leh etc. siam leh ruahman a ni.

ZPM Party chuan tunhnai chho ah ZPM leh, a bik takin an Chief Ministerial Candidate leh Leader Lalduhoma’n beih a tawk chho mawlh mawlh nia sawiin, “Thudik lo hmanga min bei fo tute hi sim tawh turin kan ngen,” an ti.

Mizoram University (MZU) hnuaiah National Education Policy (NEP) 2020 chu kalpui mek a ni a, hemi chungchang hi Mizoram University Registrar Prof Lalnundanga chuan nimin khan thuthar thehdarhtute a hrilhfiah.

I&PR Minister Lalruatkima chuan ram leh hnam hmangaihna rilru hi a dik lo zawnga kalpui theih a nih avangin kan ngaihtuahna a fim a tul thu a sawi.

Aizawl Municipal Corporation (AMC)-a Hmeichhe Corporator te chuan Central National Women Commission-a Chairperson hnenah lehkha thehlutin Manipur-a thil thleng chungchangah amah ngei Manipur-ah kal a, thil awmdan ngaihven turin an phut.

Health & Family Welfare Minister Dr R. Lalthangliana hovin nimin khan Aizawl-a SAD Conference Hall-ah Health Department hotute ten Department hnuaia hmasawnna ruhrel sak mek te an thlirho a. Building thenkhat,peihfel tep tawh te chu a theih chin chin zofel turin Minister chuan thawktute a chah bawk.

Manipur tualchhung buaina avanga Zohnahthlak harsatna tawkte tawrhpuina leh thlavang hauhna kawngzawh chu Mizoram hmundangte rualin Serchhip-ah pawh neih a ni a, Serchhip AOC Veng leh Bazar inkar-a kawngzawh a tel hi tunhnaia Serchhip-a kawngzawh-a mipui an tel tam ber pawl nia hriat a ni.

Manipur-a Zohnahthlakte thlavang hauhna kawngzawh chu nimin khan Serchhip District-a SDO (Civil) thuthmun khaw pahnih ah te pawh neih niin mipui thlawp a hlawh hle.

Serchhip Town Development Committee hma-lakna in Serchhip Leisang Veng-a NH. 54 kawngpui sir zauh hna thawh mek a ni. Serchhip Leisang Veng-a NH. 54, Theihai lui kawng kual lai hi mipuite kalna tura Footpath siam a nih hnuah kawngpui leh Footpath inkar kawng chu awng zau tak awmin kawng kual lai a nih avang leh kawng hi a len tawk loh avangin lirthei tan pawh him lo thei niin a lang a. Hei vang hian Serchhip Town Development Committee hian an sum neih sa hmangin helai kawngpui leh Footpath inkar dawl hna hi thawkin a hnuai lamah tuihawk luang tlang thei tura siamin lungrem a ni a, kar hmasa Zirtawpni atang khan hna hi thawk tanin nimin thleng khan chhunzawm a ni a, Vawiin lam hian a zualpui chu zawhfel hman beisei a ni bawk.

Serchhip Sports Complex-a SDFA Season Ending Tournament khelh mekah nimin khan Group Stage khelh zawh niin naktuk-ah Semi Final khelh a ni ang.

Thla thar August 15-a India Independence Day lo thleng tur lawm dan tur ngaihtuahin Serchhip-ah nimin khan District Bawrhsap hovin sawrkar mi pawimawh te leh khawtlang hruaitute an thukhawm.

Khawzawl District-a awm Tlangpui khua chuan Lakhuihthei an tharchhuah te chu nimin khan ZMC leh Civil Hospital Aizawl hotute hnenah an hlan a, Tlangpui Welfare President K. Thanglawta chuan, Tlangpui khua in Pathian malsawmna an dawn atanga damlo leh thawktute tana an luang chhuak chu lawmawm a tih thu sawiin, an khua Tlangpui pawhin malsawmna tam zawk dawng zel se a duh thu a sawi. Tlangpui khua hian nikum khan Lakhuihthei hi thar tanin Quintal 600 vel an thar a, kumin hian Quintal 2,000 aia tlem lo tharchhuah an in beisei bawk a ni.

Nimin khan Chief Minister Zoramthanga kaihhruaiin CMO Conference Hall-ah Prime Minister’s Development Initiative for North East Region (PM-DevINE) 2023-24 atana Mizorama hmalakna tur ruahmanna awm (proposal) te sawihona neih a ni a, he hunah hian Planning & Programme Implementation Department changtu Secretary Lalmalsawma Pachuau chuan sawi hawnna a neih hnuah proposal hrang hrang chhawpchhuah pariat te chu a thehluttu Department te powerpoint presentation hmangin an sawifiah a ni.

Mara Autonomous District Council (MA-DC) Fur thutkhawm ni hnih awh tur chu nimin khan Siaha-a MADC Session Hall-ah neih tan a ni a, MADC Chairman N. Viakhu kaihhruai he thutkhawm ah hian kumin June 1-a MDC boral sunna hun hmangin zawhna leh chhanna hun hman zui a ni a. Chawhnu lamah Official bill pahnih chu pharh niin Dan tesep panga (5) chu House Dawhkan-ah dah a ni bawk. Thutkhawm hi Vawiin ah chhunzawmin zawhfel nghal a ni ang.

Hnahthial District Bawrhsap R Lalremsanga chuan nimin khan Hnahthial District-a Journalist mi 6 te hnenah Press Accreditation Card a hlan a, Bawrhsap chuan Journalist te chu thudik leh tluantling mipuite hrilhhriatna kawngah tan la zual sauh sauh tura fuihin, sawrkar in a pawm-puina te chu vawngnunga thu dik leh rintlak chauh chhawpchhuaktu ni fo turin a chah a. Tunlaia Social Media chak tak leh thuthang tam tak karah thudik ziktluak lo puanchhuahin harsatna tam tak a thlen theih thu sawiin, Journalist te chu an thu dawn te thlifim hmasa phawt thin turin a chah bawk. Hnahthial District-ah hian MJA Member mi 6 awmin Accredited Journalist mi 6 an awm bawk a ni.

Mizoram State Election Commission (SEC) chuan Mizoram hmun thenkhata Village Council leh Local Council by-election neih hun tur nimin khan a puang.

Chief Minister Zoramthanga chuan Manipur Zohnathlak te leh raltlante tan Central-ah theihtawpin nawr chhunzawm zel an tum thu a sawi.

Manipur-a Zofate thlavang hauhna lantir nan nimin khan Mizoram hmun hrang hrangah kawngzawh a ni.

Mamit District Hospital-in Damdawi In fai thlanna, Kayakalp 2022-2023 a lawmman pathumna a dawn lawmna chu nimin khan neih niin Mamit bialtu MLA leh Roads & Infrastructure Development Board Vice Chairman Er. H. Lalzirliana chuan a hmanpui a, thawktute thawhrimna leh inpekna avanga faina kawnga inelna lawmman an dawng chu a lawmpui thu sawiin, Building hlui zawka lawmman lak theih a nih chuan Hospital building thar sak zawh tepah phei chuan lawmman hlu zawk an lak theih ngei a beisei thu a sawi bawk.

Mizoram NGO Co-ordination Committee hruaitute chuan nimin chawhnu khan Governor Dr. Hari Babu Kambhampati chu Raj Bhavan-ah hmuin Prime Minister Narendra Modi hnena thawn tur lehkhathawn - Prayer for Restoration of Peace and Harmony in Manipur chu an thehlut a. NGO-Coordination Lehkhathawn hi Union Home Minister hnenah copy thehluh a nih bakah Union Home Secretary pawh copy pek a ni bawk.

Mizoram in Parliament-a Member a neih pahnih, Lok Sabha Member C. Lalrosanga leh Rajya Sabha Member K. Vanlalvena te chuan NDA atanga chhuah mai an duh thu an sawi.

Rural Development Minister Lalruatkima chuan sawrkar hnathawk te chu mipui rawngbawltu - Public Servant an nihna angin mipui tan harsatna siamtu ni lova, mite tana malsawmna nih tum turin leh mipui rin ngam ni turin a chah.

SDFA Season Ending Tournament khelh mekah Vawiin hian Group Match khelh zawh a ni dawn a, naktip-ah Semi Final khelh a ni ang.

Serchhip District-a Manipur atanga Meitei awm zingah a zatve vel te chuan Serchhip District chhuahsanin Manipur an pan tawh.

Mizoram-a tlawmngai pawl hrang hrangte telna, NGO Co-Ordination Committee in an lo ruahman tawh angin Vawiin hian Mizoram hmun hrang hrangah ‘Zohnahthlak unaute Thlavang hauhna’ kawngzawh neih a ni dawn.

Serchhip-a Excise & Narcotics Department chuan nimin zing dar 8:30 vel khan Serchhip leh Thenzawl inkar Mat Lei bulah Heroin No. 4 nia hriat Hawng thum (3) an man a, a neitu nia hriat K. Lalsiammawii (30), Tuikhuah Veng Serchhip nia insawi pawh manin thubuai siam sak nghal a ni. Nimin-a Heroin an man hi gram 35.98 a rit niin Serchhip atanga Thenzawl-a pek tur nia hriat a ni a, tun dinhmunah Heroin hi Ser-chhip-a zawrhchhuahna ah Hawng khat hi Rs. 30,000/- man vel a la ni.

Commerce & Industries Minister Dr R. Lal-thangliana chuan nimin khan a Office Chamber-ah Project Pushpak Border Roads Organization (BRO) hotute kawmin kar hmasaa Delhi-a BRO Director General Rajeev Chaudhary nen an inkawm tuma an thusawi te a bawhzui a. Project Pushpak hotute nen hian Tuipui 'D' Darzo kai Lei dawh chung-chang te, Thingsai - Pankhua inkalpawhna kawng laih dan chungchang te an sawi a, chak zawka hma lak dan tur te an sawiho a ni. He thutkhawm ah hian BRO Pushpak Mizoram Chief Engineer SP. Kolipey leh a thawhpuite an tel a ni.

NGO Co-Ordination Committee in Vawiin a ‘Zohnahthlak unaute Thlavang hauhna’ kawng-zawh neih an tum chu Mizoram-a Political Party te chuan an thlawp thu an sawi a. MNF Party chuan he kawngzawh ah hian MNF mi leh sa a tam thei ang ber kal tur a nih thu thuchhuah siama tarlangin, Congress Party pawhin Congress Party mi zawng zawng a tam thei ang ber tel turin an in ngen a, ZPM chuan ZPM mi leh sa zawng zawngte kawngzawhna a tel vek tura hriattirin BJP pawhin tel vek turin an party mi te chu an ti a. Heng Party te hian Vawiin hian an Office pawh an khar dawn a ni.

ZPM Thalaite chuan Rajya Sabha MP, K. Vanlalvêna'n Manipur Zofate'n harsatna an tawh chungchânga Parliament-a sawichhuahna hun remchâng, 'Adjournment Motion' putluh a tum chu an thlawp thu sawiin, he Motion hi pulut ngei turin duhsakna an hlan tih an sawi a. BJP leh a sangawi zawnpui party-te inkhawmpui tunhnaia Bengaluru-a neihah MNF party aiawhin Lok Sabha MP C. Lalrosânga a tel nia sawiin, he hunah hian Manipur-a kan unaute harsatna tawh chungchânga an thlavâng hauhna leh Manipur sawrkâr demna sawi rîk a ni lo chu mak an tih thu an sawi bawk a ni.

Nimin khan Lunglei-ah District Bawrhsap Ramdinliani hovin Lunglei khaw thlanglam NH-302 kawng chhiat chungchanga hmalak dan tur ngaihtuah a ni a, Meeting hian tunlai ruahsur in NH-302 kawng a tihchhiat avangin Lunglei khaw-thlang Maxi Cab Service zawng zawngte chu thu leh awm hma chu July 24, 2023 atang tihtawp relin, NHIDCL leh Contractor thar, BRN Infrastructure Private Limited te chu thawktute leh hmanrua lakhawma July 26-28 (48 hours) chhung kawng siam hna chhunzawm tura tih an ni a, hemi chhung hian damlo phur leh tul bik lo chu tlan lo tura ngenin, hemi hnu hian lirthei tlan dan tur hi la ruahman leh tur a ni ang.

Mizoram Legislative Assembly inthlanpui neih tur atana inbuatsaihna kal zelah Khawzawl District-a Sector Officer leh Sector Police Officer mi 10 ruatchhuahte tan nimin khan DC Conference Hall-ah Training buatsaih a ni a, inthlan hma (pre-poll), inthlan ni (poll day) leh inthlan zawh (post-poll) a an mawhphurhna hrang hrang te hrilhfiah niin Inthlan neihna tura thil pawi-mawh zual ‘Assured Minimum Facilties’ enfiah dan te, Vulnerabilty Mapping neih dan tur bakah Electronic Voting Machine (EVM) hman dan inzirtirna ‘EVM Hands-on’ te neih a ni bawk.

Deputy Chief Minister Tawnluia chuan nimin zing khan Aizawl Chanmari-ah cheng nuai 30 senga siam 'Ramlai Road' a hawng a, he kawng hawn thar chu a bultannaa tur a nih thu sawiin, tihchang-tlun zelna tur pawh an ngaihtuah dawn thu leh Chaltlang Dingdi Veng thleng a tlang chhoh theih nan kawng an zawng zel ang tih a sawi bawk. Ramlai Road hi tunhma chuan Two-Wheeler chiah tlan theihna niin, kawng thar siamna atan H. Sanga, Chanmari ram chu cheng nuai 120 a lei niin kawng hi lirthei ke li tlan theiin tih zauh a ni a, Chanmari leh Chanmari West inrina ah awmin chhungkaw 90 velin an chhawr tangkai dawn a ni.

Manipur buaina kal mekah Zohnahthlak hmei-chhia laka nunrawnna rapthlak tak May ni 4 a thleng duhloh lantir nan nimin khan Siaha-ah  Mara Chano Py (MCHP) Hqrs., Mizo Hmeichhe Insuihkhawm Pawl (MHIP) Sub-Hqrs.Siaha leh Lai Women Association (LWA) Sub-Hqrs. Siaha te huaihawtin kawngzawh a ni a, he kawngzawh hi Siaha Bazar Traffic Point atangin New Siaha Vety Kawn thlenga neih niin mi 1200 vel an tel a, Thuziak chi hrang hrang; Manipur Meitei leh Manipur sawrkar demna an keng bawk a ni.

Social Welfare & Tribal Affairs Minister Er. Lalrinawma hovin nimin khan 'Zakapa Award' Organising Committee chu thukhawmin kumin September thla chhungin he award hi sem turin ruahmanna an siam.

Mizoram Director General of Police (DGP) Anil Shukla IPS chuan Mizoram-ah Meitei vau tawh an la hriat loh thu sawiin, tunhnaia Meitei haw te chu an hlauh avanga haw an nih thu a sawi.

Mizoram Lok Sabha MP C. Lalrosanga chuan Parliament Fur thutkhawm ni thumna ah pawh thukhawm hleithei lovin House rorel inkhawm thtawp ni mahse Manipur-a buaina thleng chungchang chu sawichhuah a la tum zel tho tih a sawi.

Tualthah thubuai avanga damchhung-a lung In tang tura Court in kumin June 20-a a chungthu a rel Tungsianmuanga (41), Hnahlan chu nimin zing dar 9:30 vel khan Champhai District Jail atangin a tlanchhuak a, nzian zantir lam khan man leh nghal a ni.

Mizoram-a Jail leh Home hrang hranga ‘Integrated STI, HIV, TB, Hepatitis (ISHTH) Campaign’ neih zawh takah heng natna hrang hrang kai hmuhchhuah thar engemaw zat an awm.

Lawngtlai District Land Owners' Association chuan Mizoram Chief Secretary hnenah Ultimatum thehlutin, Zangnadawmna an hmuh tur ang tun thla chhunga an hmulo a nih chuan an thiam anga hmalakna kalpui chhunzawm an tum thu an hrilh.

Sports & Youth Services Department leh MZP tangkawp buatsaihin nimin khan Aizawl Vanapa Hall-ah ‘Youth-20 Meet on Nationalism, Patriotism & Development’ neih a ni a, he hun hi Deputy Chief Minister Tawnluia chuan khuallian niin a hmanpui a ni.

ZPM Vice President Rev. Dr. K. Thanzauva chuan Kalphung tharah eirukna an nawr tawm dawn tih a sawi.

MNF President Zoramthanga chuan, “Keini chu Pathian leh kan ram tan tih hi kan sahal khai a ni. Kan sahal khai nena inmil lo chu kan hnawl vek thin,” tiin NDA, UPA leh INDIA-in an tan awmzia a neih loh thu a sawi a. Zofate rorelna pakhat hnuaia awm thu chu tunhnaia an sawi thar a nih loh thu a sawi bawk.

Tun thla ni 7-a Keitum khuaa hmeichhe nau-pang kum 8 mi Lalpeksangi d/o Lalrinsangi boral chungchangah NH. 54 laihzauh leh siamthat hna thawk mektu Company chuan zangnadawmna atan cheng nuai 4 an pe a, he sum hi Lalpeksangi nu hnenah hian hlan fel a ni tawh nia thudawn a ni. Hetihlai hian vanduaina tawk Lalpeksangi chhungte hi Serchhip District Bawrhsap Nazuk Kumar IAS pawhin vanduaina an tawh hnu hian tlawhin kawng siam hna thawktute hi Lalpeksangi Thlan siamna tur tum sak turin a ti a, hemi ang hian Thlan Lung leh a siamna tur hmanrua (Cement, Balu, adt) bakah buhfai bag khat leh Ar kg. 50 tum turin an intiam nia thudawn a ni bawk.

Serchhip District-a tlawmngai pawl hrang hrang telna, NGO Co-Ordination Committee Inrinni kalta (July 22, 2023) tlai-a thukhawm chuan NGO Co-Ordination Committee Aizawl in Manipur-a Zohnahthlak te harsatna leh tawrhna thlavang hauhna kawngzawh tun thla ni 25-a neih tura a rel chu Serchhip-ah pawh neih ve nise an ti.

Serchhip Sub-Hqrs. YMA chuan Manipur tualchhung buaina avanga harsatna tawk Zohnahthlak te tanpuina khawn nise an ti.

Serchhip District Football Association (SDFA) buatsaih Season Ending Tournament chu khelh mek niin Vawiin lam hian Semi Final khel tur hriat theih tan a ni ang.

Tun thla ni 18 hnu lamah Mizoram-ah CO-VID-19 hri kai an awm leh tawh rih lo a, IDSP chhinchhiah danin Mizoram-a COVID-19 hri kai enkawl dam hnuhnung ber chu tun thla ni 17 khan enkawl dam niin hemi hnu hian hri kai hmuh belh awm rih lovin chawlhkar khat dawn chu COVID-19 hri kai an awm leh tawh lo a ni. Mizoram-ah hian COVID-19 hri kai mi 2,39,555 hmuh ni tawhin kumin bikah hri kai mi 588 hmuh an ni a, COVID-19 hri kai hmuh atang hian mi 734 thiin kumin bikah hri kai mi 8 in an thihpui bawk a ni.

Mizoram Rajya Sabha MP. K. Vanlalvena chuan Parliament thutkhawm neih mekah Dan an hmanlai Rule 267 tlawhchhana Parliament Session kal lai titawp a, Manipur buaina leh thil thleng chungchang sawihona hun hawn a ngenna chu a hlawhtlin dawn leh dawn loh a la hriat loh thu a sawi a. A hlawhtling lo a nih chuan ngawih mai a tum lo tih sawiin, “Session apiangin nitin Zero hour hawn thin a ni a, hawn a nih veleh Manipur buaina sawiho tura rawtna ka auchhuahpui nghal dawn. A tlang lo a nih chuan ka thu mai mai lo ang, ka ding tlat dawn a ni ringawt,” a ti. Zirtawpni tlai a National Democratic Alliance (NDA) MP te inhmuhkhawmna-ah pawh Mizoram atanga MP pahnih te chu an tel lo nia thudawn a ni.

Khawbel Students' Union Aizawl Inrinni khan an dinchampha pualin Aizawl Civil Hospital-ah thisen pek runpui an buatsaih a, he hun hi Khawbel bialtu MLA leh SW&TA Minister Er. Lalrinawma chuan a telpui a ni. Khawbel Students' Union Aizawl hi kum 1993-a din niin kum 2016 atang khan kumtin an pawl din chamah hian midang tan thisen an pe thin a, kumin hi vawi 8 an pekna a ni tawh a. Er. Lalrinawma chuan midangte chhanhim thei tura ding tur chuan hriselna leh nun uluk a invawn a pawimawh thu sawiin, thalaite chu ruihhlo leh mipat hmeichhiatna laka fihlim turin a chah bawk.

Mizo Zirlai Pawl (MZP) hruaitute chuan Inrinni khan Aizawl Press Club-ah thuthar thehdarhtute kawmin May ni 3 atanga Manipur a Zohnahthlak te leh Meitei te inkara buaina chhuak chu an ngaih-ven reng tih sawiin, a tul angin an che chhuak zel ang tih an sawi a. Manipur-a Zofate harsatna rap-thlak tak mai thlentirtu Meitei te leh Zohnahthlak unaute chu thlamuang taka awm ho chi an ni tawh lo tih sawiin, hei vang hian an duh ber, ‘Separate Administration’ nei tura an beihna chu thupui lian ber a nih reng thu leh MZP chuan a tawp thlengin a thlawp zel dawn tih an sawi bawk.

Kawnpui Police-te chuan Aadhaar Card lem siam chungchangah mi pathum an man a, nimin khan Kolasib District Court-a hruai an nih hnuin Kolasib District Jail-ah dahluh an ni. Heng mi an man te hi Robert Vanlalruata (38), Tahan Myohlah, tuna Aizawl Zarkawt-a khawsa ni a inchhal, Rebecca Malsawmpuii (30), Aizawl Thuampui leh Zosangpuii (54), Aizawl Saron Veng nia inchhal te an ni. Kawnpui Police te hian Aadhaar Card lem siam chungchangah tun hma pawhin man leh thubuai siam sak an lo nei tawh thin a ni.