IOCL in Minister sawipui

IOCL Executive Director & State Head, Assam Oil Division (North East) bialtu leh a hote chuan nimin khan Supply Minister K. Lalrinliana chu a Pisa-ah hmuin Mualkhang Bottling Plant sak len leh sak that tumna chu tan vat theih a nih dawn thu leh hemi atana lungphum phum dan tur leh a hun turte an sawipui a. Mualkhang-a Gas Bottling Plant hi kum 2006-a lo hawn tawh niin, Oil Industry Safety Directorate in Safety norms an siam te a phak tawh loh avangin kum 2020 kumtir khan khar a ni a. A siam that leh tihlenna turin Mizoram sawrkar chuan kum 2021 khan ram hectare 2-a zau leiin a lo pe tawh a ni.

Tunlai hian Mizoram-a LPG mamawh zat hi nitin truck 20 vel a ni a, hei hi cylinder 6120 vel niin Thla khat ah 1,83,600 vel mamawh a nih bakah kum khatkhat ah cylinder 22,03,200 vel mamawh anga chhut a ni a. Tuna Gas Bottling Pant siam thar tur hi 30 TMTPA - 30000 Metric Tonnes Per Annum niin, kum khat a Metric Tone 30000 siam chhuak thei tur a duan a ni a, thla 24 chhung a siam zawh tur a ruahman a ni.