DC&MA Minister hovin ADC hotute thukhawm

District Council & Minority Affairs (DC&MA) Minister Robert Romawia Royte hovin nimin khan Mizoram-a Autonomous District Council pathum hotute chuan thutkhawm an nei.

Secretariat Conference Hall-a he thutkhawm neih ah hian Mizoram-a Autonomous District Council pathum - Mara Autonomous District Council, Chakma Autonomous District Council leh Lai Autonomous District Council-a Chief Executive Members (CEM), Executive Members (EM), Executive Secretaries, Siaha leh Lawngtlai Deputy Commissioner leh District Council & Minority Affairs Departments hotute an tel a, DC&MA Minister chuan ADC pathumte hamthatna tur ngaihtuahin Sixth Schedule area-a awm an nih anga an hamthatna leh chanvo turte Department leh State sawrkar pawhin ngaihtuahsak a pawimawh thu a sawi a. Mizoram state sawrkar, DC&MA Department leh ADC pathum ten hmasawn tura lungrualna leh thawhhona tha nei zel turin kalkhawmte sawmin, Mizoram sawrkar in ADC te tan budget atanga hlawh bak a pek Development hnathawhna tur sum a awm loh avanga Project siama a rawt bawk a ni.

He Meeting-ah hian Autonomous District Council pathumten harsatna hrang hrang an neihte,Gazetted Officer hnathawktu hmun ruak hnawhkhah thu-ah te, thil dang pawimawh hrang hrangte pawh sawiho a ni a. Autonomous District Council pathumten anmahni inrelbawlna leh Mizoram sawrkar inkara harsatna tam tak sawilan te a theih anga chin felpui a tum thu DC&MA Minister chuan a sawi a ni.