Ram leh hnam hmangaihna rilru ah kan ngaihtuahna a fim a tul - I&PR Minister

I&PR Minister Lalruatkima chuan ram leh hnam hmangaihna rilru hi a dik lo zawnga kalpui theih a nih avangin kan ngaihtuahna a fim a tul thu a sawi.

Sports & Youth Services Department leh Mizo Zirlai Pawl (MZP) tangkawpin thalaite tana ‘Youth-20 Meet on Nationalism, Patriotism & Development’ nimin-a Aizawl Vanapa Hall-a an buatsaih a hmanpuina ah I&PR Minister chuan he thu hi sawiin, Y-20 Meet thupui atana thlan ‘Nationalism, Patriotism & Development’ tih chu Mizoram tan leh a chhunga cheng thalaite tan tha a tih thu leh thangtharte tan tunlai boruak nen inhmehna tak nei nia a hriat thu a sawi a. “Khawvel-ah hnam tam takin ram mumal nei lova an awm laiin keini chuan ram ti a chhal tur kan pi leh pu ten min lo sahthlak saka min lo humhalhsak tawh kan rochun a, he ram kan thlahtuten luchhum banchhum huama an lo humhalh hi kan chan tur a ni lova, kan humhalh tlat tur a ni,” a ti a. “Khawvel-ah hnam tam tak an lo ral tawh a, a ruh no no chhuakah tih khawvela kan chen avangin damkhawchhuak tur chuan kawng engkimah kan in fit a tul a, zawmthaw leh ngaihsam taka kan awm chuan kan la inchhir dawn a ni,” tiin kan hnam leh ram hi ropui taka a dinchhuah theihnan thalaite chu ram leh hnam hmangaihna rilru pu chunga theihtawp chhuaha zir tur leh Mizoram tana mi tangkai nih ngei tum turin a chah bawk.

I&PR Minister chuan, “Mizo kan ni emaw, Kuki kan ni emaw, Chin kan ni emaw pawh nise kan danglam chuang lo, thisen inzawm vek kan ni a, kan chenna hmun a hrang rih mai a ni,” tiin “Ram in ri nei mahse hnam in ri a nei lova, Zohnahthlak tawh phawt chu zai khata kan luan a pawimawh takzet a, chhulkhat chhuak kan nih avangin Myanmar, Manipur, Tripura leh Bangladesh a kan unaute tahna hi kan tahna a ni a. An rilru natna hi kan rilru natna a ni ve thova, an tawrhna hi kan tawrhna a ni bawk,” a ti a. Khawvel-a dingchhuak tur chuan kan tanrual a tul thu leh kan tam a ngai tih pawh sawiin, “Hnam zahawm ni a dingchhuak tur chuan kan tam a tul a, mipate pawh innghahna tlak ni turin tun ai hian kan tan lehzual a ngai a, inchimralna chi hrang hrang a awm a, chung zingah chuan population assimilation hi a hlauhawm ber avangin Mizote hi kan inthlahpun a tul a, ram leh hnam hmangaih tura zirtirna dik leh tha nen kan inkaihhruai a ngai a ni,” a ti bawk.

Youth-20 Meet on Nationalism, Patriotism & Development hi MZP Vice President Andrew F. Lalramnghaka chuan kaihruaiin Resource Person mi 3- Dr. Martin Chawngsailova, State Program Coordinator, NP-NCD, NPHCE; Lalengzuala, Informatics Officer, ICT Department leh Administrative Training Institute (ATI) Ffaculty Golda Dell Zohmangaihi te chuan thupui hrang hrang hmangin thu an sawi a ni.

Comments

Popular News (Last 30 Days)

LPG man bithliah thar