Serchhip-ah Manipur buaina avanga Zohnahthlak te thlavang hauhna kawngzawh neih a ni

Manipur tualchhung buaina avanga Zohnahthlak harsatna tawkte tawrhpuina leh thlavang hauhna kawngzawh chu Mizoram hmundangte rualin Serchhip-ah pawh neih a ni a, Serchhip AOC Veng leh Bazar inkar-a kawngzawh a tel hi tunhnaia Serchhip-a kawngzawh-a mipui an tel tam ber pawl nia hriat a ni.

Manipur-a Zohnahthlak harsatna tawkte tawrhpuina leh thlavang hauhna kawngzawh hi Serchhip AOC Veng atanga neih tan niin mipui ten kawng an zawh hma hian MZP Hqrs. Serchhip Vice President R. Lalmalsawma kaihhruaiin hun hman hmasak a ni a, he hunah hian MUP District Hqrs. Serchhip-a Asst. Secretary Lalhmangaiha Chawngthu chuan hunserh hmangin hemi hnu hian mipui ten Bazar panin kawng an zawh a, ‘Manipur-a Meitei ten tihboral an tum mek te hi - Kan unau te an ni’ tih te; ‘Manipur Hnam leh Hnam inkara buaina hi - Central sawrkar in tireh rawh se’ tih te; ‘Manipur Zo hmeichhia te chunga Meitei nunrawng chet dan hi - Kan ngaidam thei lo’ tih leh ‘Manipur unaute lo zam suh u - In tan kan awm e’ tiin an aurual a. He hunah hian Serchhip-a sawrkar hnathawk hrang hrang te, Political Party hruaitute, tlawmngai pawl hrang hranga Member leh khawtlang hruaitute, Kohhran hruaitute leh mipui tel an tam hle a, Serchhip AOC Veng leh Bazar inkar-a sumdawnna dawr zawng zawngte pawh khar niin lirthei vakvel pawh a awm meuh lo a, mipui ten an thlawp tha hle a ni.

Kawngzawh neih hnu hian Serchhip Bazar Tual-ah Serchhip District NGO Co-Ordination Committee Secretary K. Laltlanmawia kaihhruaiin inkhawm neih zui a ni a, he hunah hian NGOCC Chairman leh Serchhip Sub-Hqrs. YMA President Kawlthuama chuan Mizote chu Thian chhan thih ngam, Kristian kan nih hma phei chuan Mi Lu la thin kan ni tih sawiin, Manipur-a Meitei te chu tlanchhe chunga tlangmi te kutthlak tawh lo turin a chah a. Manipur-a Zohnahthlak te thlavang hauh turin Mizo thalai sing chuang an awm thu sawiin,Manipur Chief Minister in tlang mite tih chimit vek a tumna chu bansan tura a duh thu sawi bawkin, Manipur-a tualchhung buaina chungchang ah hian Prime Minister chu tawngchhuak turin a ngen bawk.

MUP District Hqrs. Serchhip President T. Lalrawngbawla pawhin Manipur tualchhung buaina chu Meitei leh tlang mite inkar buaina angin lang mahse, a phen ah thil inthup dang a awm nia a lan thu a sawi a, tun thlengin Mizoram-a Meitei awm ten kut an la tuarloh chhan chu Mizote Kristian kan nih vang a ni tiin, phuba lak chu thil chakawm tak ni mahse Pathian kutah i dah ang u, tiin kalkhawmte chu a chah a ni.

MHIP Sub-Hqrs. President Lianthangi chuan Manipur buaina ah naupang, kum upa leh hmeichhia te pawhin harsatna nasa tak an tawk tih sawiin, tunhnaia Hmeichhia te chunga mawilo taka chetna leh an taksa mawina zahlo taka tihbawrh-banna video a darh chu na an tih thu leh an tuar dam thei lo tih sawiin, ‘Hetiang Video hi hmuh leh kan duh tawh lo,” a ti bawk.

MZP Hqrs. Serchhip President Laltlan-mawia pawhin Manipur-a Zohnahthlak te tawrhna chu na an tih thu leh kan thin a rim thu sawiin, chet lak ve mai duh te pawh an awm thu a sawi a, amaherawh chu Mizote chu Kristian, Aia upa te zaha an thu ngaichang thin an nih avanga la insum mai an ni tih a sawi a. Meitei te chu Tribal an ni lo tih sawiin, Mizoram-a awm tura ILP mamawh an nih avangin hmalak a tul thu a sawi bawk.

MSU Hqrs. Serchhip President Lal-ruatpuia Chhangte pawhin Mizoram-ah Meitei Census an neih tawh thu leh hei hi phuba lak an tum vang a ni lo tih sawiin, Mizoram-a Meitei te chu fimkhur turin a chah a, Manipur-a thil thleng hian Hnam inlungrualna thlen se an duh thu a sawi bawk.

Nimin-a kawngzawh ah hian Manipur a raltlan te tan Tanpuina Bawm dawh niin Rs. 84,350/- zet a tlingkhawm a ni.