Cheng nuai 60 chuang senga sak Serchhip Kawnpui VC Hall hawn a ni
Serchhip Kawnpui VC Hall thar hi nimin zing khan Serchhip District Bawrhsap Nazuk Kumar hian hawngin VC Hall hawn tak chu mipui ten tangkai taka an hman a duhsak thu a sawi a, Sawrkar sum piah lamah khawtlang mipuiin thilphal taka an sum leh pai, an tha leh zung te senga Hall tha tak an din thei chu chhuanawm a tih thu leh a lawmpui thu a sawi bawk. Nazuk Kumar chuan tun tum hi Serchhip DC anga programme a hman hnuhnun ber a nih tawh tur thu sawiin, Serchhip-a a awm chhunga duhsakna a dawn zawng zawngah lawmthu a sawi a. A awm chhungin mipuiten chhungkua ang maia an en thu leh duhsakna leh chawimawina tam tak a dawn thu a sawi a. DC anga a awmna hmasa berah Serchhip DC a ni thei chu vannei a intih thu sawiin, hun lo kal zel turah pawh Serchhip District tana tih theih a neih phawt chuan theihtawp chhuah zel a tum thu sawi bawk.
Serchhip Kawnpui VC Hall hawnna leh lawmna inkhawm hi nimin chawhnu lam khan Serchhip Kawnpui VC Vice President Lalzuiliana kaihhruaiin Hall thar-ah hian neih leh a ni a, he hun hi Serchhip Addl. DC James Lalnithanga chuan hmanpuiin mipui ten sum leh pai an thawhkhawm atanga Hall tha tak sak a ni chu lawmawm a tih thu leh mipuite tana tawiawm tlak VC an ni tih a lang niin a sawi a. VC kan ni emaw, kan thil tihna reng reng ah kan thiltih kan hrechiang tur a ni tih sawiin, chumi kawngah chuan Dan kan hriat a pawimawh thu leh Dan hre lo chuan a huai theih loh thu leh rinawm taka thil kan tih thin a tul thu a sawi a, rinawmna vawng nungtu ni theuh turin kalkhawmte chu a chah bawk.
He hunah hian khual zahawm Serchhip DLAO Gaston Vanlalhriatpuia pawhin VC ten Hall tha tak an sa leh hawn a ni ta chu lawmawm a tih thu sawiin, VC te chu kan ram inrelbawlna ah mipui te hmuh theih democracy hmasa ber, mahni huamchhunga Dan lekkawhtu an nih avangin an pawimawh zia a sawi a. VC te chu an huamchhunga In hmun ruahman thu leh vantlang kawng humhalh chungchangah hma la zel turin a chah bawk.
He hunah hian Serchhip Kawnpui VC President V. Tlangthuama chuan Serchhip Kawnpui VC hi kum 2015-ah din a nih thu leh an huamchhung mipuite tan punkhawmna leh pui-punna atana hman tur Hall an neih loh avangin VC thar an neih atangin ngaih pawimawh ah neih a nih thu a sawi a. An Hall sak thar chu hnuah hmang duh te an awm tak reng avang leh hawn loha hman reng chu tha an tih loh avangin an hawng ta tih sawiin, tunah hian rawng hnawih la ni lo mah se Material Components atangin sum a awm tawh sa thu leh khaw tuihul veleh an hnawih dawn thu a sawi a. An Hall thar chu Polling Station atan puan a nih tawh thu a sawi a, hei mai bakah hian an VC te hmalakna in Thlanmual ram an lei tawh thu a sawi bawk.
Serchhip Kawnpui VC Treasurer K. Laldaihvela’n report a pek atanga a lan danin he Hall sakna atan hian VC hmasa ten cheng nuai 27 hmangin tun VC term-ah hian mipuite sum thawh-khawm (MRNREGS) Rs. 28,68,170 hman a ni a, hei bakah hian 15th Finance Commission atanga sum hmuh Rs. 4,90,000/- bakah mipui ten Chair leina tur an thawhkhawm Rs. 88,520/-; a vaiin cheng nuai 61.46 sen a ni.
Serchhip Kawnpui VC Hall thar hi Serchhip Ramthlun Veng-a ‘Kawn Tuikhur’ awmna hmunah sak niin kawng an chungah Conference Hall awmin mi 150 vel thut theihna niin Gallery siam a nih bakah Chair dah nghal a ni a, kawng an-ah hian Meeting Hall awmin hei hi Polling Station-a hman theih tura ruahman a ni a, a hnuaiah Anganwadi Centre leh YMA Library te awm tura ruahman a ni bawk.
Comments
Post a Comment