Chekawn leh Artahkawn inkar kawng siam zo dawn hnai

Chekawn leh Artahkawn inkar kawng siam-that hna SASCI sum hmanga thawh mek chu zaa 99 vel zawhfel ni tawhin thla thar August thla chawhma lam chuan hna hi thawh zawh vek an beisei thu PWD hotute chuan an sawi.
SASCI sum cheng vbc. 7.39 hmanga Chekawn leh Artahkawn inkar kawng siamthat hna thawh mek hi niminpiah khan Serchhip-a thuthar thehdarhtu thenkhat chuan tlawhin hna thawh mek dinhmun te an enfiah a, he hna hi kumin April thla vel atang khan PWD hnuaiah SLT Infracon Pvt. Ltd. chuan an thawk a, he kawng hi KM 7.600 a thui niin he hna huamchhungah hian kawng blacktop that bakah Humepipe Culvert siam, Side Drain meter 200 a thui siam leh Retaining Wall siam turte a tel a, hei bakah hian Biate leh Tuipui inkar kawng km 1.5 siam tur pawh a tel bawk a ni. 

Heng hna hrang hrang zinga a tam zawk chu zawhfel a nih tawh thu heng hna enkawltu PWD North Vanlaiphai Sub-Division a SDO chuan LENKAWL hrilhin, hna thawh tur atanga chhutin zaa 99 chu zofel tawh ah an inngaih thu a sawi a, Humepipe Culvert siam tur chu a hmun tur tihfel har a nih avangin hna tan har a nih thu leh tunah hian tan theih a nih tawh thu sawiin, tuihawk tamna lai bika meter 200 vela thui Side Drain siam tur pawh tunkar chho hian hna tan tum a nih thu a sawi bawk a, heng hna te hi thla thar August thla chawhma lamah chuan zawhfel theih an inbeisei thu a sawi bawk a ni.

Tarlan tawh angin Chekawn leh Artah-kawn inkar kawng hi thui lo te ni mah se kawng chhia hi hun rei tak chhung siamthat a nih loh avangin lirthei tan kal a harsa thin hle a. Tuichangral South Group YMA huamchhunga YMA Branch te pawhin hnatlang te neiin a siamthat hna hi an thawk a. Bialtu MLA leh Home Minister Lalchamliana chuan April 21, 2022 khan helai kawng hi siam a nih tur thu puangin, tunah chuan hna pawh thawh zawh thawkhat a ni ta a ni.