MZU Registrar-in National Education Policy 2020 kalpui tak thuthar thehdarhtute hnenah sawifiah

Mizoram University (MZU) hnuaiah National Education Policy (NEP) 2020 chu kalpui mek a ni a, hemi chungchang hi Mizoram University Registrar Prof Lalnundanga chuan nimin khan thuthar thehdarhtute a hrilhfiah.

MZU Registrar sawi danin NEP 2020 chu Mizoram University leh a hnuaia College awmte ah hlenchhuah anih theih nan Committee pathum- Committee for Implementation of NEP 2020 at MZU Level; Committee for Implementation of NEP 2020 at Affiliated Colleges Level leh Committee for Implementation of NEP 2020 at Pachhunga University College te a din a. Hei bakah hian Prof. Lalhmasai Chuaungo, Department of Education, MZU kaihhruaina hnuaia awm turin Task Force Committee din leh niin he Task Force Committee hian NEP 2020 hlenchhuah a nih theih nan Postgraduate leh Undergraduate-te tan inkaihhruaina tur an buatsaih a ni. 

Mizoram University hian National Education Policy 2020 chu nikum August thlaa hman tan tak Academic Session 2022-23 ah khan Post-Graduate Programme zawng zawngah a hmang tan a ni. Task Force Committee chuan Under Graduate tan Curriculum leh Credit Framework chu UGC draft behchhanin December 12, 2022 khan a tichhuak a. Committee chuan Mizoram-a College hrang hrang Principal, Zirtitute leh sawrkar hotute rawnin kumin July thla a Academic Council neih ah Framework hi hman theih turin a pawm ta a ni. 

Mizoram University chuan College a zir theih tur Vocational leh Skill Enhancement Course a duan te chu sawrkar hruaitute a hrilh hre tawh a, bawhzui turin State Level Committee on Skill Courses din a ni a. Vocational leh Skill Enhancement Course te hi tha taka a kal theih nan Mizoram University hnuaiah Skill Assessment Board (SAB) din a ni tawh bawk.

National Education Policy (NEP) 2020 hnuaiah hian Zirlaiten Course emaw, Discipline pakhat emaw chauha insawrbing lovin an tuina leh an ngaihven Course bik an thlang thei a. Zirlaiten an credit hmuh zat a zirin an Degree leh Certificate/diploma hloh si lovin an zirlai an chhuahsan thei a. Zirlaite chu kum khat hnuah certificate neiin an chhuak thei a, kum hnih hnuah Diploma leh kum thum hnuah Bachelor's degree nen an chhuak thei a, hei mai bakah hian Bachelor's with Research chu kum 4 hnuah an chhuak thei bawk ang. Zirlaiten Multi leh Inter-Disciplinary Learning an neih theih nan Institution dangah an zuangkai thei a, an remchan dan a zirin Offline emaw, Online emaw a inkawp pawhin an duh dan an thlang thei bawk a ni.