Mizoram-ah zirna kalphung NEP thui tak kalpui a ni tawh

India ramchhunga zirna kalphung thar hman tura duan New Education Policy (NEP) chu Mizo-ram-ah pawh thui tak kalpui a ni tawh.

Inrinni kalta (July 29, 2023) kha New Education Policy (NEP) hman tan champha vawi thumna niin Higher & Technical Education Director Sangchin Chinzah chuan, tun Academic Session kallai atang hian Mizoram College-te chuan a theih ang angin NEP hi an kalpui tan mek tih a sawi a, Ministry of Education lamin ruahmanna an siam ang chu an theih anga tih hlawhtlin zel an tum tih a sawi. H&TE Director chuan NEP chu vawi leh khata thatpui nghal hluai chi ni lem lo, hun a kal deuh hnua tha tur a nih thu a sawi a. Zirna kalphung tharah chuan zirlaibu chauh ni lovin a taka thawh lam a tam tih sawiin, 'All round development' chu a taka langin zirlaite’n nasa takin an hlawkpui ang tih a sawi a ni.

Mizoram Board of School Education (MBSE) Academic Officer Jonathan Lalrinmawia chuan, NEP hi a tir atang khan Mizoram School hrang hrangah kalpui a lo ni tawh tih sawiin, hmalakna tur a tam avangin thawk leh khatah a vaia tih nghal vek theih erawh a la ni vek lo tih a sawi a. MBSE-in a kalpui tawh zingah hian, tawng chi hniha zirlai zir (Bilingual), Higher Order Thinking Skills (HOTS), Competency-Based Education (CBE) leh Online hmanga zirlai zirte chu kalpui a ni tawh a, hmalakna dang pawh neih chhun-zawm zel tura tih a ni bawk. NEP hman tan champha vawi thumna hi Delhi khawpuiah hman niin MBSE Chairman JH. Zoremthanga leh Senior Academic Officer C. Laldinpuia te an tel a ni.

Tarlan tawh angin NEP hi Mizoram University pawhin a kalpui tawh a, NEP champha vawi thumna pual hian Zirtawpni khan Kendriya Vidyalaya Aizawl chuan Library Room-ah thuthar thehdartute an kawm a. Principal Incharge R. Zoremsiami chuan NEP hnuaiah zirna an kalpui tih sawiin, zirlai naupang ten zirlai mai bakah thiam thil dang an zir tih a sawi a ni.