Chief Minister in theihtawp-a nawr zel a tum tih a sawi

Chief Minister Zoramthanga chuan Manipur Zohnathlak te leh raltlante tan Central-ah theihtawpin nawr chhunzawm zel an tum thu a sawi.

All NGO Co-Ordination Committee in nimin-a 'Manipur Zohnathlak Unaute Thlavang Hauhna Kawngzawh/Solidarity March in Support of Zo Ethnic Tribe of Manipur' an buatsaih a tel zawh hnua Chanchinthar thehdarhtu ten an kawmnaah Chief Minister Zoramthanga chuan hlawhtling taka All NGO ten kawngzawh an huaihawt chu lawmawm a tih thu leh an thlawp thu a sawi a. Raltlante theihtawpa lo tanpui chu an tih tur hmasa a ni tih sawiin, India sawrkar leh Manipur sawrkarin buaina hi an chinfel theihna tura sawrkar laipui nawr chu a pahnihna a nih thu a sawi a. Hemi atan hian Manipur leh central sawrkar hian mamawhna an nei a nih chuan theihtawp an chhuah tur thu a sawi bawk.

Central sawrkarin Manipur raltlante tanpuina tur cheng vbc. 10 Mizoram sawrkar an pek tur an la pek loh chungchangah theihtawp chhuah zel an tum thu sawiin, India sawrkar pawhin hei hi an tih thuai a rinthu leh Manipur leh State dangah pawh Central hian tanpuina hi pek an tum nia a hriat thu a sawi bawk a. Mizoram sawrkar duhdan angin Manipur leh Central sawrkar hian inremna nei thei ta lo se, engtiangin nge hma an lak ang tih zawhna chu Chief Minister chuan theihtawp a chhuah tur thu a sawi a, buaina a reh theihna atana a tawp thlenga hmalak chu an tih tur a ni, a ti.

MNF in NDA an zawm chungchanga zawhna chu Chief Minister Zoramthanga chuan dinhmun tawn ang zela danglam thei a nih thu a sawi a, NDA an zawm avanga an thu leh hla zawm vek tur an nih loh thu sawiin, Mizote tana tha tur chu an dah pawimawh ber tih a sawi bawk.