Mizoram MP pahnih ten dodal zel an tum thu an sawi

Mizoram MP C. Lalrosanga (Lok Sabha) leh K. Vanlalvena (Rajya Sabha) te chuan sawrkar lai BJP kaihhruai NDA a tel an ni chungin Forest Conservation Amendment Bill, 2023 chu an duh loh thu leh an dodal thu an sawi.

Lok Sabha MP C. Lalrosanga chuan he dan siamthatna hi Ningani khan Lok Sabha chuan a pawm thu a sawi a. Sawihona pawh awm lovin in auhbuaina karah 'aw' vote hmanga pawm a ni, a ti a. Hetiang tho hian Rajya Sabha-ah pawh an tih a rinawm thu a sawi. Sawihona awma sawina hun pek a nih chuan a dodal zawnga sawi ve ngei a tum laiin chutiang tihna hun awm lovin pawm liam a ni tih sawiin, Manipur a tharum thawhna thleng mek chungchang auchhuahpui a la tum zel thu a sawi a. Sawrkar lam hian an remtih erawh a rin lem loh thu a sawi a ni.

Rajya Sabha MP K. Vanlalvena pawhin Forest Conservation Amendment Bill hi Mizoram leh India hmarchhak pumpui taka thil tha lo tak a nih avangin Rajya Sabha a sawiho tura chhawpchhuah a nih hunah hun pek a nih chuan a dodal zawnga sawi a tum thu a sawi bawk a. Manipur buaina chungchanga rule 267 tlawhchhana thusawi hi nitin a la dil ta zel a, phalsak a la nih loh thu leh eptu MP dangte dilna pawh Rajya Sabha Chairman Jagdeep Dhankar chuan a la phalsak rih lo a ni, a ti.

Mizoram MP pahnihte chuan NDA a tel an ni chungin Uniform Civil Code (UCC) pawh Parliament chhungah leh pawnah an dodal thu leh dodal zui zel an tum thu an sawi a. Mizoram mipuiin an duh loh thil chu do tlat an tum thu an sawi a ni.