‘Safety for domestic employees and other’ tih thupui hmangin Regional Level Seminar neih a ni

Nimin khan ‘Safety for domestic employees and other’ tih thupui hmangin India hmarchhak State huap Regional Level Seminar chu Assembly Annexe Conference Hall-ah neih a ni.

Mizoram-ah hna a indaih loh tak em avangin hmeichhiate ram pawnah hna zawnga chhuah a tul ta fo a. A bikin Damdawi In-a nurse hna thawk tur te, Spa leh Salon, House-maid leh hna hrang hrang thawk turin ramdang pan an tam ta hle a. Hetiang a nih avang hian Private Placement Agencies te pawh awm ta nualin, Mizoram-ah pawh hmeichhiate hna zawnpuiin hmeichhe tam tak heng agency te hian ram dangah an thawnchhuak thin a. Ram pawna hna thawka chhuak te hian training an neih lai atanga harsatna leh buaina tawk te an awm a, an thawhna hmuna harsatna tawk pawh an awm nual thin a, an harsatna tawh hian mahni taksa zawrhna lamah te pawh a hnuhluh thin avangin hetiang dinhmun a thlen tak avang hian North East States te chu tangrualin dan (law) neih te tangkai zawkin leh hman a nih dan tur ang taka hman a nih nan hma lain, Private Placement Agencies te pawhin registration felfai tak an neih a, dan an zawm a, hemi lama thawkte pawh a hma aia chak zawka thuamthat an neih theih beiseiin Regional Level Seminar hi buatsaih a ni.

National Commission for Women bultuma Mizoram State Commission for Women leh Women and Child Development Department tangkawpin an buatsaih he Seminar hi Social Welfare & Tribal Affairs Minister Er. Lalrinawma chuan hmanpuiin he Seminar hmang tura State chhung leh pawn atanga tel te lawmna thu a sawi a, Hman-ah chuan hmeichhiate chu In-ah awmin, nau awm leh inchhung sekrek khawih chu an kutah a awm thin thu leh tunah chuan hmeichhe tam takin eizawngin nitin In an chhuahsan a lo ngaih takah chuan inchhung tihfai te, eirawngbawl, nau awm leh adangte ti tura midang rawih mamawhna a lo san tak thu a sawi a. Hei hian thawh tur mamawh tam tak tan inhlawhna kawng siam phah mahse, hmun thenkhatah chuan dikna inrahbehsakna te a awm thin a. Hei hi a pawiin, heng 'domestic worker' te dikna leh zahawmna humhim a nih nan leh hemi kawnga harsatna hrang hrangte sukiang tura NCW leh MSCW tangkawpin zirhona an buatsaih chu lawmawm a tih thu a sawi bawk.

Seminar hawnna inkhawm hi MSCW Chairperson Lallawmchhungi chuan a kaihruaiin kalkhawmte lawmna thu a sawi a, Mizoram DGP Anil Shukla leh Women & Child Development Director Zoramthangi Chhangte te pawhin thu an sawi a. Hawnna inkhawm neih zawh hian Moderator I&PR Director Mina Zoliani kaihhruaiin mi thiam hrang hrangte hnen atangin thupui zirhona leh sawihona neih a nih bakah domestic employee kaihhnawih report hrang hrang ngaihthlak a ni bawk.