Mizoram MP pahnih ten NDA atanga chhuah an duh

Mizoram in Parliament-a Member a neih pahnih, Lok Sabha Member C. Lalrosanga leh Rajya Sabha Member K. Vanlalvena te chuan NDA atanga chhuah mai an duh thu an sawi.

AIR Aizawl in a tarlan danin Mizoram MP pahnih te hian Manipur BJP sawrkar hnuaia tharum thawhna tihtawp lova a awm avang leh sawrkar laipuiin Uniform Civil Code (UCC) hman a tum ni a a lan avangin NDA-a awm reng chu thil tha ni a an hriat tawh loh thu an sawi a. Thutlukna erawh chu anmahni siam theih a ni lova, MNF party hruaitute thutlukna tur a nih thu sawiin, anmahni mimal ngaihdan leh duhdan an sawi chhuak mai niin an sawi a ni. NDA a awm party MP-te inhmuhkhawmna-ah pawh Manipur tharum thawhna leh UCC chungchang sawi chhuak lo tura tih an nih avangin tunhnaia NDA MP-te inhmuhkhawmna-ah pawh an tel tawh lo a ni.

Mizoram Lok Sabha MP C. Lalrosanga leh Rajya Sabha MP K. Vanlalvena te chuan Manipur Chief Minister N. Biren Singh chu a bang a nih loh pawhin Manipur-a President’s Rule puan ni se a that zawk an rin thu an lo sawi ve ve tawh a. Chutiang a nih loh chuan tharum thawhna tihtawp a ni thei dawnin a lang lova, nunna tam zawk chan a hlauhawm a ni, an ti a. Manipur chungchang Parliament a sawiho an duh thu leh chumi atan chuan Adjournment Motion putluh an dil ve ve bawk a, hei hi phalsak an la ni lo a. Anni chiah hi NDA MP zinga Manipur chungchang Parliament a sawiho ngiat awmchhun an ni a, a dang chu eptu party MP-te vek an ni.

Hetihlai hian Parliament thutkhawm neih mek chu nimin khan Manipur-a tharum thawhna thleng chungchang avangin rorel thei lo siam leh a ni a, Lok Sabha-ah chuan eptu Party ten Prime Minister Narendra Modi-a chu Manipur buaina chungchang sawi turin an phut a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar