Vetpreneur Business Plan-ah lawmman sem a ni

National Livelstock Mission hnuaiah Vetpreneur Business Plan Competition buatsaiha tithate hnenah nimin khan lawmman semna neih a ni.

Synod Conference Centre, Aizawl-a 'Vetpreneur Business Plan Competition 2023' kharna leh lawmman semna hun buatsaih ah hian AH & Vety Minister Er.Lalrinawma chuan Vety Department in ranvulhtute tan tunhma chuan Small Scale zawng leh subsidy ang zawngin hma an la nasa tih sawiin, hei hian beisei angin awmzia a nei tawk lo nia hriat a nih avangin State sawrkar leh sawrkar laipui pawhin ngaihtuahna thar sengin a ki an thlak ta tih a sawi a. Tunhnai atang chuan entrepreneurship hawi zawngin an programme hrang hrangte hi an her chho hret hret tih sawiin, “Tunah pawh National Livelstock Mission hnuaiah Vetpreneur Business Plan Competition te kan buatsaih ta a. Hei hi kan bultanna pawimawh tak pakhat a ni a, hei hian kan ram economy chawikanna kawngah pawh awmzia thui tak a neih ka beisei a ni,” tiin Ranvulh leh a kaihhnawih Livestock, Value Chain, Milk Processing, Meat Processing leh a dangte a inhmnamhnawihte dawmkana chawikan chu an tum ber a nih thu a sawi bawk.

AH&Vety Minister chuan Animal Husbandry chu kan economy puitu pawimawh ber te zinga mi anih avangin hma kan sawn zel a pawimawh thu leh thalai lehkhathiam leh a ngaihna hre tak tak ten ngai pawimawha Animal Husbandry lama entrepreneurship an kalpui chu lawmawm a tih thu a sawi a. Vety department chhinchhiah danin kum kalta khan phai atangin bawnghnute litre nuai 137 lo lutin, Ar puahsa metric ton 1030, Artui pum nuai 373 lai a lo lut tih pawh sawiin, heng zawng zawng leina atana ram pawna Mizoram mipuite sum luang chhuak hi cheng nuai 20000 chuang a nih thu a sawi a, “Kan thalai a ngaihna hria te nen kan tan tlan phawt chuan reilote ah sa leh artuiah kan intodeloh ngei ngei ka ring,” a ti bawk.

He Competition-ah hian Tpic pali - Meat processing, Milk Processing, Livestock Value Chain leh Veterinary Service Delivery hmangin District hrang hrang atangin mi 49 ten Business plan an thehlut a. Heng te atang hian Dr. Freddy H. Siamthara, Upper Kanan, Aizawl (Vetmiss) chu pakhatna niin Rs. 3,00,000/- an dawng a, Winkle Laltlanchhunga, Upper Kanan Aizawl (Trinity Organic Farm) chu pahnihna niin Rs. 2,00,000/- a dawn bakah pathumna Dr. Angela L. Renthlei, Pema Colony, Chaltlang (GR Food) chuan Rs. 1,00,000/- a dawng bawk a. Midang panga te hnenah Consolation prize Rs. 10,000/- theuh hlan an ni bawk.

Nimin-a he hun hmanna ah hian Vetpreneurship lama hlawhtling mi 4 te hnenah Vetpreneur Special Award hlan niin, an hmalakna video clip thlirho a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar