KMMTTP-ah ram neitu ten Ultimatum an thehlut; Chief Minister hovin zangnadawmna ngaihtuah a ni

Lawngtlai District Land Owners' Association chuan Mizoram Chief Secretary hnenah Ultimatum thehlutin, Zangnadawmna an hmuh tur ang tun thla chhunga an hmulo a nih chuan an thiam anga hmalakna kalpui chhunzawm an tum thu an hrilh.

Lawngtlai atanga Myanmar ram pawha kawngpui sial, Kaladan Multi Modal Transit Project kawngpuiin an ram a tihchhiatsak intelkhawm, Lawngtlai District Land Owners' Association hian zangnadawmna an hmuhna tur daltu ber chu Mizoram Sawrkar hnuaia Environment, Forest & Climate Change Department an nih thu sawi nawnin, mimal ram zau tak an chuhpui tih an sawi a, Guwahati High Court in ram neitu dik tak mi 138 te hnenah compensation pek ni rawh se a tih chungchangah Mizoram Sawrkar leh Ministry of Road, Transport and Highway in thutlukna siam rawh se a tih chu thlamuang taka an nghah laiin, hmalakna lawmawm lam hriat tur an neilo chu vanduaithlak an tih thu an sawi a.

State Sawrkar thu angin Lawngtlai DC in Sawrkar hmalakna ngaichang tura a ngenna pawh thataka an zawm laiin an beisei ang hriattur a awmloh vangin July 2023 chhung ngeia Mizoram Forest Department hian an ram dik tak Hactare 15.24 atanga NPV&CA an siam lo emaw, Ram neitu mi 138-ten an ram tihchhiat man zangnadawmna an hmuhna tura mi 138 te tan Forest Clearence a siam lo a nih chuan August 1, 2023 atang chuan Lawngtlai District Forest Office chu Office kal thei lova dan an tum thu leh zangnadawmna an hmu lo emaw, zangnadawmna an hmuhna tura an lungawina tawk hmalakna a awm lo a nih chuan. KMMTTP Road chu an ram a nihna angin hnathawh chhunzawm an phal dawnloh thu leh lirthei kaltlang pawh an remtih danwloh thu Chief Secretary hnenah hian an thlen a ni.

Hetihlai hian nimin khan Chief Minister Zoramthanga hovin a Pisa-ah Kaladan Multi Modal Transit Transports Project kawngpui compensation chungchang relin Official pawimawhte an thukhawm a. He Meeting hian he International Highway pawimawh tak, India Act East hmalakna hnuaia thawh hi hawn a nih thuai theih nan zangnadawmna dawngtu tur dik takte hnena zangnadawmna pechhuak thuai tura Ministry of Road Transport & Highway-a Chief Minister hminga DO lehkha ziah nise an ti a. Ministry in hriat belh duh a neih apiangte pawh a ranglama hrilhhriat zel ni se an ti bawk. KMMTTP kawngpui laih vanga zangnadawmna dawng thei tur finfiah hi chhungkaw 138 awm mekin nimin-a thutkhawm ah hian Adviser to CM leh Navin Kumar Choudhary IAS, Principal Secretary bakah sawrkar mi pawimawh dangte an tel a ni.