Health Department hnuaia hmasawnna ruhrel sak mek dinhmun Health Minister hovin thlirho a ni

Health & Family Welfare Minister Dr R. Lalthangliana hovin nimin khan Aizawl-a SAD Conference Hall-ah Health Department hotute ten Department hnuaia hmasawnna ruhrel sak mek te an thlirho a. Building thenkhat,peihfel tep tawh te chu a theih chin chin zofel turin Minister chuan thawktute a chah bawk.

He thutkhawm ah hian Health Minister Dr. R. Lalthangliana chuan kum hnih lai hripui len avangin infrastructure buatsaih leh building sak hna a khaihlak tih sawiin, hripui a kian hnu in Department in tan an khawh a, tunah chuan infrastructure lamah hma kan sawn thu a sawi a, building thenkhat sak zawh tawh niin thenkhatte peihfel tep a nih thu Health Minister chuan sawiin, hengte pawh hi tun thla chhungin theihtawp chhuaha a theih chin chin zofel turin Department hotute chu a chah a. Cheng vbc. 103 senga sak Zoram Medical College Academic Building thar chu August ni 7 hawn a nih dawn thu leh he building hawng tur hian Chief Minister chu sawm a nih thu a sawi bawk.

He hunah hian Health & Family Welfare Department Engineers atangin hna hrang hrang sak mek leh sak tura tintuah dinhmun leh thlen chin te ngaihtlak a ni. Heng zingah hian District Hospital thenkhata Critical Care Building te; Khum 50 awmna AYUSH Hospital Kulikawn te; Mizoram hmun hrang hranga PHC sak zawh tep tawh te; Mamit Hospital sak mek te; District thar 3-a CMO Building peihfel tep tawh te; World Bank Project hnuaia District Hospital thenkhat tichangtlunna tur ruahmanna te, Urban PHC – Aizawl District chhunga 6, Lunglei District chhunga 4 leh District dang zawng tana pakhat theuh sakna tur te, Saitual-a khum 10 awmna tur AYUSH Damdawi In leh MSACS hnuaia State Resource Centre for HIV/AIDS te telin an dinhmun thlirho a ni.

He thutkhawm ah hian Principal Secretary, Health & Family Welfare Esther Lalruatkimi leh Principal Director H&FW Department te bakah Directorate 2 – DHS leh DHME Director te, Mission Director NHM te, AYUSH Directorate hotute, MSHCS leh MSACS hotute an tel a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man