MNF Thalai bultumin Thenzawl-ah Independence Day Football Tournament khel

MNF Thalai, Mizo National Youth Front (MNYF) Thenzawl bultuma Thenzawl Zone Football Association (TZFA) buatsaih ‘Independence Day Football Tournament 2023’ chu nimin khan Thenzawl-a Lothazawl Playground-ah khelh tan a ni.
Thenzawl Zone huamchhunga Veng leh khaw hrang hrangte tana buatsaih ‘Independence Day Football Tournament 2023’ hi MNF Publicity Board Vice Chairman J. Malsawmzuala Vanchhawng chuan hawngin infiamna chi hrang hrangte chu mihring hriselna atan a pawimawh piah lamah eizawnna tling a ni chho ta zel tih a sawi a, Serchhip District-ah pawh Footballer hlawhtling tak tak an awm tawh thu leh, Thenzawl bik pawhin MPL Player te chherchhuakin hmasawnna tam tak a tawng chho mek tih a sawi a. Thalaite tan infiamna lama record neih that chu hna chi hrang hrang zawnna ah pawh a pawimawh chho zel tih sawiin, Mizoram sawrkar dinglai pawhin infiammite hamthatna turin Sawrkar hna lakna ah Group B Non -Gazetted chin hnuailam ah chuan za zela panga (5%) chu infiamna lama titha bikte tan a hauh sak a nih tawh thu a sawi bawk.


Khawvel-ah ram inchuh avanga indona a tam thu leh kan chhehvel-ah pawh buaina tawk an awm reng thu MNF Publicity Board Vice Chairman chuan sawiin, Manipur-ah pawh hnam tam zawk, Meitei te chu rawva taka chein, kan unaute chu nek chepin an awm mek thu a sawi a, chutiang bawkin Bangladesh leh Myanmar lama pawh kan unaute pawhin harsatna nasa tak an tawk bawk a, hetihlaia an inhumhimna tur leh thlamuang taka an chawlh hahdamna tur Mizoram Pathian in Zofate min lo pe chu a lawmawm hle tih a sawi a. Mizo thalaite chu chenna tur ram nuam tak, khawtlang nun nuam, mi lian leh mi te inthliarna awm lohna hmun, Zonun zemawi par vulna hmun Pathian in a pek avanga lawmna chang hre fo turin a chah a. Mizoram in remna leh muanna tluantling a nei te, Vawiin thlenga Mizo hlang deuhthaw chenna State a la ni thei te chu hruaitu hmasa leh ni mekte thawhrimna, remhriatna leh inpekna rah a ni tih hrechhuak fo tura chahin, State dangte nena khaikhinin Mizoram in that bikna tam tak a neih laia a tha lo lai awmchhun te sawi uar lutuk chu kum naupang zawkte leh thalaite rilru kawng dik loa hruai thei a nih thu a sawi a, mi beidawng leh beiseina nei lo chu chhungkua, khawtlang leh ram tibuaitu an nih thin avangin hmalam hun eng tak nei, thalaite chu beiseina nung nen, an hmalam hun thlir turin a chah bawk.

Thenzawl Zone Football Association buatsaih ‘Independence Day Football Tournament 2023’ ah hian YMA Branch hrang hrang inelna leh Veteran inelna bakah Age Group, Under-10, 13 leh 16 te tan inelna buatsaih a ni.

Comments

Popular News (Last 30 Days)

LPG man bithliah thar