Sawrkar laipui-a raltlan tanpuina dil la hmu lo

Manipur buaina avanga sahimna zawnga Mizoram-a rawn raltlante enkawlna senso atana Chief Minister Zoramthanga’n sawrkar laipui hnenah cheng vbc. 10 a dil chu ni 67 hnu-ah pawh pek a la ni lo.

Home Department hotute sawi danin May ni 3-a Manipur a buaina a chhuah hnu lawkah Manipur tlangram-a cheng tam tak, an sahimna atan leh In leh lo halsak an nih avangin Mizoram-ah lo lutin an pung chho zel a. Chief Minister chuan May ni 16 khan an sahimna zawnga rawn lut a awm zui ta rihte enkawlna atan hian sawrkar laipui-ah cheng vbc. 5 a dil a. An lo luh belh tam tak em avangin May ni 23 khan tanpuina cheng vbc. 10 a dil leh a. Hei hi Tourism Minister Robert Romawia Royte hovin Official te nen Delhi-ah Union Home Secretary Ajay Kumar Bhalla hmu-in an zu nawr zui a. Tawngkam tha-a a lo thlah chungin a taka engmah hmuh a awm lova. Chief Minister hian Ajay Kumar Bhalla hi a be leh tawh bawk a. Chuti chung chuan tun thlengin sawrkar laipui chu a la thung a ni.

Hetihlai hian Manipur atanga rawn raltlante mamawh zual phuhrukna atan Home Department-in an dil angin Finance Department chuan tunhnai khan cheng vbc. 5 a pe chhuak a. Administrative Approval leh Expenditure Sanction pawh tihfel a ni tawh a, an mamawh ang zela District tin Bawrhsap hnena pekchhuah tur a ni. Tunah hian District Bawrhsap te hian sum an lo sen tawhte Home Department-ah an thehlut mek a, dawn kim a nih hunah an mamawh dan anga pek chhuah thuai tum a ni.