Manipur State chhung inrelbawlna a inrawlh a puhna Chief Minister in thu diklo a nih thu a sawi

Chief Minister Zoramthanga chuan Manipur State chhung inrelbawlna-a inrawlh a puh a nihna chu thu diklo a ni tih sawiin, NGO Coordination Committee-in Aizawl a kawngzawh an huaihawt-a a tel vena chhan chu kha kawngzawh kha Manipur-a remna leh muanna a awm theihna atan leh Manipur Zofate thlavang hauhna a nih vang a ni tih a sawi.

Chief Minister Zoramthanga chuan Manipur Chief Minister N. Biren Singh-a'n Manipur State chhung inrelbawlna-a inrawlh a puhna chu thu diklo a nih thu leh a inrawlh loh thu sawiin, Zofate insuihkhawm-a rorelna pakhat hnuaia awm theihna atana hmalak chu Biren Singh-a pian kum, kum 1961 atang khan MNF thiltum a lo ni daih tawh tih a sawi a. MNF rammu sawrkar aiawhte leh India sawrkar inbiakna-ah pawh he thil hi a laimu pakhat ni mah se India sawrkar lamin Constitution Article 3-na-ah a inziah sa avangin a intiamkam duh ta lo mai chauh a ni, a ti a. Manipur a Meitei-hovin hmun hrang hranga a Lim an hal chu an zalenna an hmang a ni ve mai-a a ngaih thu sawiin, “Democracy ram a ni a, an thiam danin an ti ve mai,” tiin a lim haltute huatna leh an chunga thinrimna a neih loh thu a sawi a ni.

Manipur-a tharum thawhna chu Mizoram-ah a kangkai ve mek thu leh mi 12,000 chuan an sahimna zawngin an rawn raltlan tawh tih sawiin, chuvangin a tan pawh ngawih mai mai theih a ni bik lo tih a sawi a, an buaina hian Mizoram chauh lo hmarchhak State hrang hrangah nghawng a neih a rin thu leh nakum Parliament inthlanpui-ah pawh MNF thawhpui NDA hian an tawrh phah mai thei tih sawiin, Manipur buaina chungchanga sawrkar laipui chet dan chu mak a tih thu a sawi a. An sahimna zawnga In lum luah thei lo leh an In leh lo hala tihchhiatsakte tanpui tura sawrkar laipui che muang lutuk chu tha a tih loh thu a sawi.

MNF chu NDA a tel a ni chungin an thil tih zawng zawng an pawm dawn loh thu MNF President ni bawk Zoramthanga chuan a sawi a. Uniform Civil Code (UCC) chungchangah pawh NDA thiltih chu an dodal thu leh NDA an zawmna chhan chu hmasawnna thil ah a ni tih a sawi a, Mizote nunphung leh Sakhaw tana tha lo an tih dawn chuan an dodal zel dawn niin a sawi bawk a. UCC chu dan siam a a taka India rama hman chi ni a a ngaih loh thu sawiin, NDA hruaitute pawh puitling taka ngaihtuahna senga thutlukna an siam a beisei thu a sawi bawk.