Consumer te puitu leh an dikna chanvo humhimna atan Web Portal leh Mobile App tlangzarh a ni

Deputy Chief Minister Tawnluia chuan mipui (Consumer) te puitu leh an dikna chanvo humhimna atan ruahman Web Portal leh Mobile App chu nimin khan a tlangzarh.

Department of Personnel & Administrative Reforms changtu Deputy Chief Minister Tawnluia hian Aizawl-a ATI Auditorium-ah ATI hnuaia tunhnaia din Centre of Excellence Consumer Help Desk kaltlanga mipui (consumer) ten an dikna chanvo an hriatzau thei nan leh heng te hi humhima kawng hranga anmahni puithei tu ruahmanna hrang hrang – Web Portal, Mobile Apps, man chawi ngai lova biakpawhna Toll Free leh Booklet te tlangzarhin Mizoram-ah Consumer te an dikna leh chanvo chungchangah an tim thu sawiin, Consumer (Pawisa a thil leitu) ten Awareness an tlakchham avangin a Quality thalo te, a buk diklo te, a siam ni leh thih ni inziaklo te, Agent in a tihtur a tih lohah te, pawlhdal chungchangah te han sawisel emaw, kan dikna humhim tur a aw chhuah emaw te kan la tim hle tih a sawi a. Mipui tam zawkin an dikna chanvo an hmuh theihna tura ATI-a Consumer Help Centre a din chu mipui in an tangkaipui a beisei thu leh ATI-hmun a va kal kher ngai lova Portal leh Mobile atanga Mizoram khawilai atang pawha Consumer ten an dikna chanvo an hmuh theihna tura thil hriattur an hriat zung zung theihna tur ruahman a nih thu a sawi bawk.

He hunah hian Supply Minister K. Lalrinliana pawhin mipuiin kan thil lei reng reng hi a dik nge dik lo tih te, buk a tling nge a tling lo tih te leh a tha nge tha lo tih te kan chik a ngai hle tih sawiin, Consumer ten kan dikna leh chanvo kan hriatna leh humhimna kawnga mipui kan inzirtir leh awareness kan siam zel a pawimawh thu a sawi a. Hetiang kawnga thil diklo kan tawng emaw thil fello a awm chuan District Consumer Forum-ah te leh State Consumer Forum-ah te complain nachang kan hriat a pawimawh thu a sawi bawk.

ATI leh DP&AR (Good Governance Cell) te chuan ‘Setting up of Consumer Help Centre and Creation of Web Portal and Mobile App’ tih chu Sawrkar Laipui-a Department of Administrative Reforms & Public Grievances, Ministry of Personnel, Public Grievances & Pensions-ah thehlutin Project hi pawmpui a ni a. He project kaltlang hian Consumer-te tana hriat tur pawimawh leh an mamawh hun apianga an chhawr tangkai theih tur consumerchhantu.mizoram.gov.in (Web-Portal) leh mobile atanga awlsam taka an lo chhiar theih nan ‘Chhantu’ Mobile App siam a ni a. Booklet (Consumer Chhantu) leh Toll-Free Helpline No. 18008890851 chu buatsaih a ni a. ATI hmunah ‘Consumer Help Centre’ din ni bawkin Nodal Officer Lalnunmawii Varte kaihhruaina hnuaiah thawktu pathum an awm mek a ni.

Comments

Popular News (Last 30 Days)

Vawiin-ah HSSLC Exam result