Grape tui hralh loh la ngah

Champhai leh Hnahlan-a Grape sawrna hmun ah Grape tui leh Wine siamsa thahnem tak hralh lovin a awm mek.

Champhai Grape Growers Society in Grape tui an sawrna Tlangsam-a Winery-ah chuan Grape tui sawr sa litre 1,70,000 leh Um-a thun tawh Champwine Case 400 an la nei mek a. Champhai Grape Growers Society hian Wine an siamchhuahte hi Sawrkarin phalna a pek angin Vendor 40 chuangte hnenah a pe-chhuak thin a. Winery Manager chuan Wine an siamchhuahte hi an beisei anga hralh a kal tawk loh thu sawiin, Chhiah chawi tur a san avangin Vendor te'n an la chak tawk lova, hei bakah hian Zu leh ramdang siam Beer lei tur a tam vangin an hralh chak lo nia a hriat thu a sawi.

Hetihlai hian Hnahlan Winery-ah chuan Grape tui sawr sa Litre 70,000 vel an la dahkhawl mek a, Um-a thun tawh (Isabela) Case 300 vel an la kawl mek bawk. Vendor 46-te hnenah a hlawmin an hralh chhuak thin a, Vendor zingah a nihna tur anga hma la lo an awm avangin a hralh chhuah kawngah harsatna an tawk tih Winery-a thawkte chuan an sawi a ni.

Tunlai hian Champhai Grape Growers Society leh Hnahlan Grape Grower & Processing Cooperative Society chuan Winery-a her turin Grape rah an leikhawl leh mek a. Champhai bikah Grape rahte hi Kg-ah Rs. 60-in Grape chingtute an leisak a, an Society member ni kher lo te ta pawh an hnena hralh duhte chu an leisak vek a; Grape rah Kg. 32,583 an lei tawh a ni. Hetihlai hian Hnahlan Grape Grower & Processing Cooperative Society-te pawhin Hnahlan Winery-a her turin Grape rah quintal 390 an lei tawh bawk a. Society member ta bakah Hnahlan khua leh a chheh vela Grape chingtute a man pangngaiin an leisak bawk a. Myanmar Tedim atang pawha leiin kg. ah Rs. 60/- in quintal 390 an lei tawh a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man