Pathian leh kan ram tan tih hi kan sahal khai niin hemi nena inmillo chu kan hnawl vek - MNF President

MNF President Zoramthanga chuan, “Keini chu Pathian leh kan ram tan tih hi kan sahal khai a ni. Kan sahal khai nena inmil lo chu kan hnawl vek thin,” tiin NDA, UPA leh INDIA-in an tan awmzia a neih loh thu a sawi a. Zofate rorelna pakhat hnuaia awm thu chu tunhnaia an sawi thar a nih loh thu a sawi bawk.

Mizo Hnam Run inkhawm nimin-a neih ah MNF President Zoramthanga chuan India politics chungchang sawiin, BJP leh a kaihhruai NDA leh Congress leh a kaihhruai UPA-a a kal thin thu a sawi a, “Tunah chuan UPA kha INDIA tiin an thlak a. Keini chu NDA Group-ah tel mah ila, policy leh thiltumah chuan NDA thuin kan kal lo. Keini chuan policy nghet kan nei – ‘Pathian leh kan ram tan’ tih kalha thil a lo kal chuan kan dodal mai,” a ti a. Uniform Civil Code (UCC) pawh Mizoram Assembly-ah dodal thu an pass thu leh Prime Minister hnenah pawh UCC an do tlat dawn tih a ziah thu sawiin, “NDA kalkhawmah keini anga do huai tumah an awm lo,” a ti a. “MNF chu a policy-in Mizoram hnam leh a Sakhaw humhim tura ding kan nih angin NDA hi kan hlau lo. MNF hi central sawrkar a inthlak avangin kan dinna kan la thlak ve ngai lo,” tiin “Keini tan NDA, UPA, INDIA-in awmzia a nei lo. Keini chu Pathian leh kan ram tan tih hi kan sahal khai a ni. Kan sahal khai nena inmil lo chu kan hnawl vek thin,” a ti.

Tunhnaia Manipur buaina chungchang pawh sawiin Zoramthanga chuan, Manipur Chief Minister nen an inbiak tuma Mizote rorelna pakhat hnuaia awm thu chu sawi tawh lo tura a ngenna chu tunhnaia sawi thar an ni lo ti-a a chhan thu a sawi a. “Oct 22, 1961-a MNF a pian khan Mizo hnahthlak zawng zawng rorelna pakhat hnuaia awmkhawm kan lo tum daih tawh a. India nena kan inbiaknaah pawh kan nawr nat ber a ni. Tuna tihrik thar a ni lo,” tia a chhan thu a sawi a. Manipur-a kan unau raltlan (internally displaced)-te hnenah ‘Kan ei leh in ei ang a, kan in leh in in ang’ tiin theihtawpin kan dawngsawng tih pawh sawiin, Central atanga tanpuina lokal tur tun thlenga an la pek loh chu nimin maiah Union Home Secretary a hrilh tih a sawi a. Kum 1971-a East Pakistan atanga Mosolman refugee maktaduai rual West Bengal-a lutte tuamhlawmtu kha India sawrkar a nih thu leh na taka a nawr thu sawiin, NGO Coordination Committee-ten Vawiin-a kawngzawh an huaihawt turah MNF zawng zawng tel turin a sawm bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar