Manipur buaina avanga Mizoram-ah harsatna a thlen loh nan sawrkar in hma a la zel

Tunhnaia thenawm State Manipur-a tualchhung buaina thleng avanga Mizoram-ah harsatna a thlen lohna turin Mizoram sawrkar chuan a theih angin hma la mek.

Peace Accord MNF Returnees (PAMRA) ten tun thla ni 21-a thuchhuah siama Manipur State-a Zohnahthlak awmte chunga Meitei ho chetdan rawng leh hleihluak tak avanga Mizoram-a awm Meitei te tan a him loh mai pawh thil hlauhawm tak a nih tawh avanga inthiarfihlim tura an ngenna chungchangah Home Commissioner H. Lalengmawia IAS chuan Inrinni khan a Pisa-ah PAMRA hruaitute kawmin an pawl hmalak chhan te ngaithlak a ni a. Hemi hnu hian a nghawng theih turte uluk taka sawiho a nih hnuah an sahimna atana Mizoram atanga inthiarfilhlim tura Meitei-te an tih chu Sawrkar-in hmalakna a neih zui chhoh tak avangin PAMRA hruaitute chuan an thuchhuah hi Mizoram Sawrkar ngenna zahawm tak avang leh Mizo mipuite tana tha zawk tur a nih dawn chuan bawhzui zel loh tha an ti. He an thuchhuah hi Mizorama Meitei-te tihraltitna tur emaw, Mizoram atanga hnawhchhuah lam emaw a kawk lo tih PAMRA chuan sawiin, Rilru tha takin Mizorama Meitei awmte sahim zawk nana thuchhuah hi siam an ni tih an sawi a. Hetihlai hian State pawn chanchinbu thenkhata ‘Quit Mizoram Order’ ang hiala thu an chhuah chu PAMRA chuan pawi an tih thu an sawi bawk.

PAMRA hruaitute bakah All Mizoram Manipuri Association hruaitute pawh Home Commissioner hian kawmin, AMMA hruaitute chu an mi leh sate thlamuang taka Mizoram awm tura hrilh turin leh thu lengvak avangin Mizoram chhuahsan lo turin a ngen bawk a ni.

Home Commissioner hian Mizo Students’ Union (MSU) hruaitute pawh kawmin Vawiin atanga zirna In hrang hrang leh sumdawnna hmuna Meitei Census neih an tum chungchang a sawipui a, MSU hruaitute chuan Mizoram-a Meitei awm mek te chungchanga hriat duh an neih te hre tura hmalak an tum hi Mizoram-a Meitei awm mekte hnawhchhuah leh tihthlabar tumna ni lovin an him zawk nana tih a nih thu an sawi a. Sawihona an neih hnuah MSU-in Mizoram chhunga Meitei awm te chungchanga hriat duh an neih hre tura thil tih an tumah Mizoram Sawrkarin an thil hriat duhte chu a hrilh theih dawn avang leh Sawrkar hotuten an thil tum chu kaltlangpui lo tura an ngen avangin an thil tum hi bawhzui zel loh an remti bawk a ni.