SDFA Season Ending Tournament Final Vawiin-ah khel dawn

Serchhip District Football Association (SDFA) buatsaih Season Ending Tournament chu nimin khan Semi Final khelh zawh niin Vawiin hian Final khelh a ni ang.

Serchhip Sports Complex-a SDFA Season Ending Tournament khelh mekah hian nimin khan 2nd Division ten Semi Final khel hmasain inkhel hmasa berah Keitum-I chuan Extra Time-ah Field Veng FC an hneh a, Field Veng FC tan R. Lalremruata chuan minute 24-na ah goal khungin Keitum-I tan minute 35-na ah Lallawmsanga chuan a sut a, minute 51-na ah R. Lalremruata goal khung hmangin Field Veng FC in hma hruai leh mah se hun tawp dawn minute 70+2 ah Lalrongura chuan Keitum-I tan a sut ve leh a. Extra Time khelh niin minute 3 hnuah Jerome Thanchungnunga chuan Keitum-I chakna goal a khung zui a ni.

Inkhel vawi hnihna ah Bungtlang Bazar FC in 4-0 a Bungpui FC hnehin Final an lut bawk a, Bungtlang Bazar FC tan Lalmuanpuia, Lal-hmangaihsanga, Edmond Lalropeka leh Zonunmawia ten goal khat theuh khungin Keitum-I chu Final-ah an hmachhawn leh dawn a ni.

Nimin chawhnu lam khan 1st Division Semi Final khelh zui niin kumin-a District Championship-a Champion FC Serchhip Kawnpui in an khingpui New Serchhip FC chu 5-0 a sawpin Final an lut a, FC Ser-chhip Kawnpui tan V. Lalremruata chuan hattrick siamin goal thum a khung a, heng goal a luh hnu hian A. Lianchampuia leh Gospel Darthanmawia ten goal khat ve ve an khung bawk a ni.

1st Division Semi Final hnuhnung zawkah Vengchung FC in AWC FC chu 2-1 a hnehin Final an lut bawk a, AWC FC tan R. Lalmalsawma chuan minute 6-na ah goal khung mah se Vengchung FC tan minute 12-na ah Lawmfamkima chuan a sut a, minute 35-na ah Zonuntluanga chuan goal dang khung zuiin hei hi AWC FC hian an sut thei ta lo a ni.

He Tournament Final hi Vawiin chhun dar 12:00 hian khelh a ni dawn a, 2nd Division Final Keitum-I leh Bungtlang Bazar FC ten an khelh hnuah Tournament kharna inkhawm neiin FC Serchhip Kawnpui leh Vengchung FC in Final an khel zui dawn a ni.

Comments

Popular News (Last 30 Days)

LPG man bithliah thar