Rangvamual leh Phunchawng-ah sawrkar in hma la

Rangvamual leh Phunchawng Veng-a eizawnna mumal neilo, Zu zawrh leh danin a phalloh te hmanga eizawng thinte chhanchhuahna project chu tha taka kalpui tum a ni.

Kumin July 19-a Aizawl District Bawrhsap hova Core Committee on Mission Chhanchhuahna (Alternative Income Generation Programme against Illicit Alcohol Manufacturing for Rangvamual and Phunchawng) in ruahmanna a lo siam tawh angin Zirtawpni khan Rangvamual Local Council House leh Phunchawng Presbyterian Kohhran Naupang Sunday School Hall-ah inzirtirna hun buatsaih niin Help Desk siam a ni bawk a. He Project hnuaiah hian  bultanna atan MSDRB (SWTA Department), LESDE Department, UD&PA Department, AMC, KVIB, Lead Bank leh SBI-RSETI te’n an Scheme hrang hrang, Loan leh Service dang dangte hmanga eizawnna hmuh theih dan te, bul tan tura thil tul hriat ngai te inhrilhna hun atangin hma an la chho mek a. Rangvamual leh Phunchawng-a Awareness Programme leh Help Desk neihah hian mi 170 chuang telin sawrkar Scheme leh Loan hmanga tanpui an nih theih dan tur te sawipui an ni.