Term Exam hun thleng pawha zirlaite zirlaibu la pek kim loh ZPM in pawi an ti

Zoram Peoples Movement (ZPM) Party chuan Term Exam hun thleng pawha zirlai naupang ten zirlaibu an la dawng kim thei lo chu pawi an tih thu an sawi.

ZPM Party hian Inrinni khan General Secretary Media, IT & Publicity Eddie Zosangliana Colney hovin Aizawl Press Club-ah thuthar thehdarhtute kawmin Samagra Shiksha hnuaia a thlawna zirlaibu sem thinah zirlai naupang ten zirlaibu an la dawn kim loh chungchangah thawktute July 27, 2023-a thil awmzia an zawtfiah thu leh an harsatna tawh hrang hrangte an hriatthiampui rualin ruahmanna tha awmse chuan chinfel theih nia a lan thu an sawi a. Tun dinhmunah hian Mizoram pumah Samagra Shiksha hnuaia a thlawna zirlaibu dawng tur zirlai naupang nuai khat bawr vel an awm mek thu sawiin, “Zirlai sang telin lehkhabu an la dawng kimlo hi a lungchhiatthlak kan ti hle a, hei hian a lantir chu kan sawrkar hian zirna a ngaihthah hle a ni tih a finfiah a ni,” an ti a, “Zirlaibu a thlawna sem tur pawh sem thei lo sawrkar kan nei hi ZPM chuan a vanduaithlak kan ti a. Tin, Zirtirtute pawh an hlawh hi May, June leh July (Thla 3 chhung) an pe thei lo mek a. Mizoram sawrkarin zirlaite hmakhua, zirna In leh zirtirtute a ngaihthahzia a tilang chiang hleah kan ngai a ni,” an ti.

ZPM hruaitute chuan thawktute an zawhchianna atanga a lan danin tun dinhmunah hian (raltlan tel lovin) Class IV Hindi sem tur copy 600 velin a indaih lo mek thu te, Class VII Mathematics copy 3000 velin an indaih lo mek thu leh Class II Mizo (Kumtluang 2) chu copy 1500 vel bawrin an indaih lo mek bawk thu sawiin, “A aia la manganthlak lehzual chu heng zirlaibu indaihlohna te hi zirlai naupang ten hmundang atanga anmahni sum seng pawha lei duh pawh nise lei tur la awm lo lehzel te hi a ni a. Hetiang reng reng hian zirlai naupangte hmakhua Mizoram sawrkar hian a ngaihsak lo ang tih kan lo ringphak lo hial zawk a ni,” an ti.

Kum dangah pawh zirlaibu hi a hun taka pek an nih ngai loh thu leh kumtin an dawng tlai thin nia sawiin ZPM hruaitute chuan, “Lehkhabu sem reng reng a hlawma pek ni lovin, a zeuh zeuhin an sem thin a, hengte pawh hi a ruala dawn a nih theih dan tur Vawiin thlenga thuneituten an la ruahman fel thei lo hi a pawi a. Hetiang hi a nih avangin a thleng hmasa apiang School hrang hrangah zirlai naupang daih ang tawk zelin zirtirtuten an sem thin a. Hei hian zirlaite leh zirtirtute tan harsatna nasa tak a siam thin a ni,” an ti a. Zirlaibu sem turte hi kum liamta UDISE (Unified District Information System for Education Plus) report (enrollment) ang mil zela siam thin a nih tho avangin print zat tur hi a tlangpui a hriat lawk theih tura ngaih a nih thu an sawi bawk a ni.