DSWO leh DPO Office hmun tur Minister in enfiah

Social Welfare & Tribal Affairs Minister Er. Lalrinawma chuan Serchhip-a District Social Welfare Officer (DSWO) Office leh Women and Child Development District Programme Officer (DPO) Office sakna tur hmun nimin khan a enfiah.
Serchhip District tana DSWO Office leh DPO Office sakna tur hian Chhiahtlang South VC chuan tunhnaia Serchhip District Hospital sakna tura lo rawt tawh, Serchhip Bukpui ram-a hmun thenkhat chu sawrkar hnenah pek an remtih thu lo thlen tawhin nimin khan SW&TA Minister Er. Lalrin-awma chuan an ram pek hi a hmunah a tlawh a, Social Welfare & Tribal Affairs Department-a Director Zodingpuii IAS leh Women and Child Development Department-a Director Zoramthangi Chhangte bakah thawktu dang ten tawiawmin Chhiahtlang South VC te chuan an ram pek lai hi an lo kawhhmuh a, SW&TA Minister chuan helai ram hi tha a tih thu sawiin, hmalak zui a nih dawn thu a sawi a. Tuna School Building hlui la awm te pawh cheithata Office-a luah lailawk a nih theih dan turte pawh a enfiah nghal bawk a ni.


Women and Child Development hian nikum December thla khan Serchhip-ah DPO Office hi bul lo tan tawhin mimal In luahin mipuite tana dawr theih tura kalpui mek a ni a. District Social Welfare Officer (DSWO) Office erawh hawn la ni lovin tunah hian Post siam tawhin hawn phalna dil mek a ni a, thla thar August thla khian MPSC chuan thawktu tur a la dawn a ni.

Chhiahthlang South VC te chuan tunhma deuha Serchhip District Hospital sakna tura lo kawh tawh Bukpui ram-ah hian a Mual zawl zau lai ber an thei turin Urban Primary Health Centre (UPHC) sak tum a nih thu sawiin, a hnuai chiah mual-a tlak lam chu DSWO leh DPO Office hmun atan hian ruahman a nih thu an sawi a. Serchhip CMO Dr. Lalzawmi chuan UPHC sakna tur ram hi tihfel a nih chuan sak mai theih a nih an beisei thu a sawi bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man