Manipur buaina vangin Aizawl-ah kawngzawh a ni

Manipur-a Zofate thlavang hauhna lantir nan nimin khan Mizoram hmun hrang hrangah kawngzawh a ni.

Manipur-a Zofate tawrhna tuarpuina lantirna atan hian Aizawl khawpui-ah chuan chhim lamah Kulikawn atang leh hmar lamah Chanmari Kawn lam atanga kal mi sang telin Raj Bhavan pan a kawng zawhin Raj Bhavan hung pawn-ah inkhawm neih a ni a, mipui pungkhawmte hian Manipur-a Zofate tawrhna an tawrhpui thute, sawrkar laipui inrawlh a buaina tireh tura phutna te, Manipur sawrkar bang tura nawrna te leh hmeichhiate chunga hleilenna an demna thu ziak te kengin an aurual a, Manipur a tharum thawhna tuartu nunna chan chhungte, hliamte leh In leh lo halsak avanga chenna nei lova Relief Camp a awmte tanpuina atan vehbur khawnin Rs. 10,17,970/- zet an hmu a ni.

Nimin-a kawngzawhna ah hian Central YMA President R. Lalngheta chuan Manipur-a kan Mizo pui te leh unaute tawrhna hi pawi an tihzia leh an tawrhpui zia a sawi a. Manipur sawrkar chu Zofate venghim zo lo ah puhin, an In leh lo mai pawh duhtawk lovin an Biak In te an halsak a, mi tam tak nunna in a tuar mai bakah hmeichhe pawi sawilo chunga thil thleng, sawisak an nih hnua thah an ni te, pawngsual an ni te chu an dem thu a sawi a. India sawrkar hmalakna an hmuh hian beitham an tih thu leh an dem takzet thu a sawi bawk. 

MHIP General Hqrs. President Ngurmawii Sailo pawhin he hunah hian thu sawiin an unaute, an hmeichhiat puite rapthlak taka pawngsual an nih te, sawisak an nih hnua thah an nih te chu na an tiin an tawrhpui takzet thu a sawi a. Manipur Meitei-te chet dan chu Indian Constitution kalh tlat a ni tih sawiin, Central sawrkar chu Manipur buaina chingfel turin a ngen a ni.

He kawngzawhna a tel te hian Resolution panga (5) pawmin Manipur-ah remna leh muanna a awm theih nan India sawrkar in chak takin hma la rawh se tih te; Democracy chak taka tundin a nih theih nan sawrkar laipuiin a mawhphurhna hlen thuai rawh se tih te; Manipur buaina vanga In leh lo chante, nunna chante leh hliam tuarte zangna dawmna pek ni rawh se tih te; Zohnahthlak nula pahnih an zahawmna tibawrhbanga, saruaka khawlai fanpui leh pawngsual tute lakah an phu tawk hremna pek ni rawh se tih te leh Manipur buaina vanga Biren Singh-a sawrkar in Zohnahthlak te buaina a siamsak leh Jail tang zawng zawngte chhuah vat ni rawh se tih te niin hei hi India President, India Prime Minister leh Home Minister hnenah thehluh nghal a ni dawn a ni.

Manipur-a Zofate thlavang hauhna lantir nana kawngzawh hi Mizoram khawpui hrang hrangah neih niin khaw hrang hrangah hian mipui ten an thlawp thain tel an thahnem thei hle a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar