Serchhip District-a SDO (C) thuthmun ah kawngzawh

Manipur-a Zohnahthlakte thlavang hauhna kawngzawh chu nimin khan Serchhip District-a SDO (Civil) thuthmun khaw pahnih ah te pawh neih niin mipui thlawp a hlawh hle.
Thenzawl-ah chuan he kawngzawh hi Vantawng Group YMA, Joint MHIP, Area MUP leh MSU Thenzawl Headquarters te hmalakna in neih a ni a, kawngzawh hi Thenzawl Bazar Kawn atanga tanin Vantawng Group YMA President R. Lalnunthara chuan thu a sawi a, hemi hnu hian mipuite aurualin kawng hi zawh zui a ni a, Vengthlang kawn-ah MUP aiawhin ZD. Dengkunga leh Vantawng Group YMA Vice President Chawngsangliana ten thu sawiin, Field Veng Kawn Lamthuamthum-ah Joint MHIP President R. Vanpari leh MSU Hqrs. President Sailianpuia Sailo ten thu an sawi bawk.


North Vanlaiphai-ah pawh Manipur-a Zo-hnahthlak thlavang hauhna kawngzawh hi All NGO Co-ordination Committee bultumin nimin khan Sanpoh Kawn atanga bul tanin neih a ni a, he hun hi North Vanlaiphai Joint YMA President Lal-tlanmawia chuan kaihruaiin Manipur-a Zohnah-thlâk unaute tawrhna tuarpui nân mipui ten aurual in kawng an zawh a, Manipur-a Zohnahthlak unaute tawrhna an tawrhpui thu te leh Manipur-a buaina chu Central Sawrkarin ching fel thuai tura an duh thu te aupuiin Darthlalang tlang kal hualin kawng an zawh a, Kawn hrang hrangah auruala hun an hman hnuin Sanpoh Kawn-ah bawk kawngzawh kharna hun hman a ni a, he hunah hian North Vanlaiphai Joint MHIP President J. Laldingliani leh North Vanlaiphai Area MUP President H. Lalruatthanga ten thu sawiin, Rev. Jehu Laldin-tluanga chuan tawngtaina hun a hmang bawk a ni.

Nimin-a heng khaw pahnihna kawngzawh hi mipui ten an thlawp thain tel an tam hle tih kan thudawnna chuan a sawi a, kawngzawh hun chhung hian sumdawnna hmun te kharin lirthei vakvel a awm lo a. Khawlailung-ah pawh Joint YMA in a rel angin In tinah Puandum zar a ni bawk.

Comments

Popular News (Last 30 Days)

Vawiin-ah HSSLC Exam result