Mi te tana malsawmna leh mipui rin ngam nih tum turin RD Minister in BDO te a chah

Rural Development Minister Lalruatkima chuan sawrkar hnathawk te chu mipui rawngbawltu - Public Servant an nihna angin mipui tan harsatna siamtu ni lova, mite tana malsawmna nih tum turin leh mipui rin ngam ni turin a chah.

Mizoram-a Block Development Officer (BDO) te tana ni 4 awh tur Refresher Training Course hawnna nimin-a SIRD&PR, Leitan a buatsaih a hmanpuina ah RD Minister Lalruatkima chuan BDO kalkhawmte chu Conduct Rules leh sawrkar hnathawk kaihhruaina dan hrang hrangin a sawi zawm tlat tum turin a chah a, mipui rawngbawltu - Public Servant an nihna angin mipui tan harsatna siamtu ni lova, mite tana malsawmna nih tum turin leh mipui rin ngam ni tura chahin, an nungchang pawh uluk a pawimawh thu a sawi a. Sawrkar hnathawk chu mahni tan chauh a thawk ni lovin ram leh hnam tan a thawk an nih thu hriat reng a pawimawh thu leh Office-a anmahni dawrtute chu hawihawm tak leh biak nuam taka lo dawr turin a chah a, sawrkar tana theihtawp chhuah leh rinawm taka thawk turin a chah bawk.

BDO kalkhawmte chu sawrkar in policy a duan leh hmachhawp tam tak a siamte hlawhtlinna atana kut leh ke ber an nih avangin an mawhphurhna pawh a san thu a hrilh a. India ram chu mipui sawrkarna, inthlang (election) ram niin, sawrkar chak nei tur chuan Policy leh Sawrkar kaldan tur tul angte duangtu Legislator-te leh chung Dan leh hmachhawp duansa bawhzuitu,  Executive te’n an mawhphurhna theuh chak taka an bawhzui a, an tanrual a pawimawh thu a sawi a.Sawrkar hnathawk tam tak chu rinawm tak, hnaah pawh inpe tak leh taima tak an awm mahse tam tak chu an pension hun nghak ringawt leh sum hmuhna atana hmang ringawt an awm thu sawiin, rinawm taka thawktu nih chu tum ngei turin a chah a. An hnathawhna kawngah hotute tlawn ching nilo turin leh mi tlawn ringawta hman hlel ni lo tura hrilhin, transfer chungchangah pawh hotuten an tihna hmun apiangah lungawi taka awm chu tum tur a nih thu a sawi a. “Mihring te hi kan damchhunga in zir tur kan nih angin, in hnathawh tur hmabakah pawh in zir peih mi ni zel turin leh thil thar hre chak mi nih tum r’u” tiin Minister chuan a chah bawk.

Ni 4 chhung Training neih chhung hian BDO te hian PMKSY Version 2.0, Soil & Water Conservation Works, BADP, MGNREGS, SDGs, Poshan Abhyaan, Swacch Bharat Mission, SAGY/VAGY, NRLM, GPDP leh PMAY(G) bakah Scheme dang te an zir dawn a ni.