SDFA Season Ending Tournament-ah FCSK leh Keitum an champion

SDFA Season Ending Tournament chu nimin khan zawhfel niin 1st Division-ah FC Serchhip Kawnpui leh 2nd Division-ah Keitum-I te an champion a ni.

Serchhip District Football Association (SDFA) buatsaiha tun thla ni 20 atanga Serchhip Sports Complex-a khelh Season Ending Tournament hi nimin khan Final khela zawhfel a ni a, nimin chhun khan 2nd Division Final hi khelh niin Keitum-I chuan Bungtlang Bazar FC chu si khat fai-a hnehin an Champion a, he inkhel a goal awmchhun hi minute 54-na a Lalremhlua khung a ni a, Bungtlang Bazar FC hian an si phurh hi hun tawp thlengin an sut thei lo a ni. 2nd Division-a Champion Keitum-I hian lawmman ah Trophy leh Rs. 10,000/- dawngin pahnihna hian Trophy leh Rs. 5000/- an dawng a, Fair Play lawmman Bungtlang Bazar FC ten dawngin Rs. 2000/- hlan an ni.

Hemi hnu nimin chawhnu lam khan 1st Division Final khelh leh niin FC Serchhip Kawnpui leh Vengchung FC te an inhmachhawn a, heng Team pahnih te hi Tournament hnuhnung pahnih a Champion te ve ve an ni a, inkhel hmuhnawm takah kumin-a District Championship-a Champion tawh FC Serchhip Kawnpui hian si hnih fai-a hnehna chang SDFA hnuaia intihsiakna lian ah a zawnin an Champion a, FC Serchhip Kawnpui tan hian Gospel Darthanmawia leh Lalramhluna te chuan goal khat ve ve an khung a ni. 1st Division-a Champion FC Serchip Kawnpui hian lawmman ah Trophy leh Rs. 20,000/- dawngin pahnihna Vengchung FC hian Trophy leh Rs. 10,000/- an dawng bawk a, Fair Play lawmman chu FC Serchhip Kawnpui in dawngin Rs. 2000/- hlan an ni bawk.

Nimin-a he Tournament kharna hun hi MNF Publicity Board Vice Chairman J. Malsawmzuala Vanchhawng chuan khuallian nia hmanpuiin Serchhip District in Football-ah hma a sawn nasat thu leh Footballer tha tak tak chherchhuakin hlawhtlinna a neih ho te chu chhuanawm a tih thu a sawi a. Tun hi thalaite khawvel a ni tih sawiin, “Thalaite hian theihna sang tak kan nei tih Sawrkar pawhin hriain infiammite hmasawnna tur hian kawng hrang hrangin hma a la a, Hripui leng leh buaina dang hrang hrang karah pawh MNF Sawrkar dinglai hian Sports infrastructure din kawngah hma nasa takin a la,” a ti bawk.

Tarlan tawh angin tun tuma SDFA Season Ending Tournament-ah hian 1st Division-ah Team 7 leh 2nd Division-ah Team 11 telin tun thla ni 20 atang khan khelh tan a ni.