ISHTH Campaign neih zawh tak thlirletna neih a ni

Mizoram-a Jail leh Home hrang hranga ‘Integrated STI, HIV, TB, Hepatitis (ISHTH) Campaign’ neih zawh takah heng natna hrang hrang kai hmuhchhuah thar engemaw zat an awm.

Mizoram tana ISHTH Campaign hi June ni 1, 2023 khan Health Minister Dr. R. Lalthangliana hova khuhhawnna neih a nih hnuah June thla chhung khan District hrang hranga Jail 10, Home 13 leh Observation/Special Home (Private) 22 tlawhin Health Camp vawi 78 neih a ni bawk a. Hemi chhunga an hmalakna hi thlirletin nimin khan SAD Conference Hall-ah State Oversight Committee on Prisons & Other Closed Settings chu Principal Secretary, Health & Family Welfare leh Committee Chairman ni bawk Esther Lalruatkimi hovin an thukhawm a. Committee Chairman chuan Mizoram-a Jail leh Home hrang hrangah te ISHTH Campaign thla khat chhungin hlawhtling taka neih a ni thei ta chu a lawmawm hle tih sawiin, Jail leh Home-ah te HIV leh Hepatitis C kai an tam em em chu ngaihven zui zel a pawimawh hle tih a sawi a. Jail tawt lutuk hian natna inkaichhawn ti awlsamin, Medical check-up neih leh damlote inenkawl uluk pawh a tiharsa hle tih a sawi.

He huna tarlan a nih danin ISHTH Campaign neih chhung hian mi 2602 tuam niin heng atang hian HIV, TB leh STI bakah Hepatitis B leh C test 12,573 tih a ni a, heng atang hian HIV hrik pai 72 hmuh niin TB hrik kai 384 hmuh an ni bawk a. Heng bakah hian natna dang kai te pawh engemaw zat hmuhchhuah an nih bakah rinhlelh la enzui turte pawh an awm bawk a ni.