Manipur-a thil awmdan ngaihven turin an phut

Aizawl Municipal Corporation (AMC)-a Hmeichhe Corporator te chuan Central National Women Commission-a Chairperson hnenah lehkha thehlutin Manipur-a thil thleng chungchangah amah ngei Manipur-ah kal a, thil awmdan ngaihven turin an phut.

Nimin khan AMC-a Hmeichhe Corporator te chuan State thenawm Manipur buaina a hmeichhe zahawmna tihbawrhban a ni thin leh kutthlak, pawngsual leh thah hial an tawk fo mai pawi an tih thu leh hriatthiam har an tih thu Central Women Commision Chairperson hnenah ziaka thlenin amah ngei Manipur ah kala thil awmdan ngaihven tur leh thilsual titute na taka hrem an nih ngei theihna tura hma la turin an ngen a. Meitei mipa ten Naga hmeichhia an thah chhungte hnenah Manipur sawrkarin cheng nuai 10 zangnadawmna pek leh vanduaina tawktu fanu kum a tlin huna sawrkar hna pek a tiam anga Tribal hmeichhe dang Meitei hovin rawng taka an thah te pawh zangnadawmna sawrkarin a pek an phut thu pawh tarlangin, tunhnuah North East hmeichhiate humhim an nih theihna tura hma la turin an ngen bawk a. He ngenna hi Mizoram Women Commission Chairperson kaltlanga thawnin Mizoram Women Commission Chairperson Lawmchhungi’n a lo bawhzui dawn a ni.

Hetihlai hian Mizoram Primary Teachers Association (MPTA) State Womens’ Network chuan thuchhuah siamin May ni 3, 2023 atanga tun thlenga Manipur Meitei leh Tlangmite inkara buaina a an hmeichhiatpui te tawrhna nasa tak chu an dem takzet tih an tarlang a, National Human Rights Commission chu he buaina chhui chiang tur hian an ngen bawk a ni.