Zo hnahthlak unaute thlavang hauhna kawngzawh relin Mizoram-a Meitei-te fimkhur turin NGO in an ngen

Mizoram-a tlawmngai pawl hrang hrang telna, NGO Co-Ordination Committee chuan Manipur-a Zo hnahthlak te tawrhna thleng mek hriatpuina leh tawrhpuina atan 'Zo hnahthlak unaute thlavang hauhna kawngzawh' huaihawt relin Mizoram chhunga Meitei awm mekte chu an sahimna atan fimkhur turin an ngen bawk.

Mizoram-a tlawmngai pawl hrang hrang YMA, MUP, MHIP, MZP leh MSU te telna NGO Co-Ordination Committee chu nimin khan Aizawl-a Central YMA Committee Room-ah thukhawmin Manipur-a kan unau Zo hnahthlakte harsatna tawh mek chungchang hi an sawiho a, hemi hnua thuchhuah an siam ah “Kan unaute chunga tawrhna thleng mek hriatpuina leh tawrhpui nan July ni 25, 2023 (Thawhlehni) Chawhma dar 11:00 hian Mizoram pumah 'Zo hnahthlak unaute thlavang hauhna kawngzawh' huaihawt nise,” tia an rel thu an tarlang a, Mizo mipuite thahnemngai taka kan unaute tawrhna hriatpuia thawkchhuak tura an sawm thu an tarlang bawk a ni.

Kawngzawh ni hian Mizoram chhunga In tinah Puandum zar theuh turin NGO Co-ordination Committee chuan an ngen bawk a, Sawrkar hnathawk, Zirlai, Sumdawngte leh lirthei-a eizawngtute pawh kawngzawhna ah hian an hna tulte kalsan a tel theuh turin an ngen thu an sawi a, Mizoram chhunga Meitei awm mekte chu an sahimna atan fimkhur turin NGO Co-Ordination Committee chuan a ngen thu an tarlang bawk a ni.

Hetihlai hian MHIP General Hqrs. chuan nimin khan thuchhuah siamin Zohnahthlak pawl hrang hrang intelkhawm, Indigenous Tribal Leaders' Forum (ITLF) in tunhnaia thuchhuah a tarlan danin, Meitei mipui thenkhat te chuan Kuki-Zo Tribal hmeichhe pahnih chu saruakin khawlai ah chaih kualin an pawngsual rawn tih a lan thu leh an hmeichhiat puite an nghaisa lai video hi thehdarh a ni bawk tih an tarlang a. “Hetiang thil rapthlak hi thleng thei ah pawh kan ngaih loh a ni a, Mizoram pawn a mi pawh nise, kan Zohnahthlak pui, kan unau, kan hmeichhiat puite tawrhna chu kan tawrhna a ni a, MHIP chuan na a tiin a rum tlawk tlawk a, Zohnahthlak hmeichhiate thlavang hauh turin ke a pen zel dawn a ni,” an ti.

MHIP chuan hmeichhe pawisawi lo diriam a, pawngsualtute zawnchhuah kawnga rang taka hma la tur leh Dan ang a a na thei ang bera hrem an nih theih nan Union Minister, Women and Child Development Ministry, National Women Commission leh National Human Rights Commission te hnenah ngenna lehkha an thawn thu pawh an tarlang bawk.