Mizoram-a Meitei te himna chungchangah hmalak niin Meitei zingah Mizoram chhuahsan an pung zel

Mizoram Police chuan tunhnaia Manipur State-a thil thleng avangin sawrkar lam thuneitute nen tha taka thawkho in Mizoram chhunga Manipur leh Meitei-te himna ngai pawimawhin uluk takin an vil reng tih an sawi a. Hetihlai hian Mizoram-a awm Meitei thahnem tak chuan Mizoram an chhuahsan mek thung a ni.

Manipur tualchhung buaina vanga Zohnahthlak te’n harsatna an tawh mek tuarpuina lantirna leh an thlavang hauhna atana NGO Coordination Committee naktuk-a kawngzawh an tum chungchang thlirlawkna nimin khan Mizoram DGP Anil Shukla hovin buatsaih a ni a, he hunah hian venhimna kawnga hmalakna tur hrang hrangte an rel bakah Mizorama khawsa Manipur mi leh Meitei-te himna chungchanga hmalakna te thlir nawn a ni bawk a. DGP Anil Shukla chuan thil tha lo thleng a awm lohna turin venhimna kawng hrang hrangah theihtawp chhuah a ngaih thu sawiin, Mizoram chhung hmun hrang hranga mahni huamchhungah theuh Manipur buaina kaihhnawiha thil duhawm lo thleng a awm lohna turin mi leh sa, lirthei leh ruahmanna felfai nena inring renga awm turin Officer-te chu a chah a ni. Mizoram Police chuan sawrkar lam thuneitute nen tha taka thawkho in Mizoram chhunga Manipur leh Meitei-te himna a ngai pawimawhin uluk takin a vil reng tih an sawi a. Khua leh tui zawng zawngte himna an duh bakah ramchhunga remna leh muanna chhawm un kawngah tlawmngai pawl te chu thawhho pui-ah an sawm nawn leh bawk a ni. 

Hetihlai hian Inrinni khan Meitei mi 65 chuan Lengpui thlawhna tumhmun atangin Imphal an pan a, nimin khan Manipur sawrkarin Aizawl leh Imphal inkarah Indigo thlawhtheihna pathum a hranpa-in a ruahman dawn niin phailam chan-chinbute’n ziak mah se Lengpui tumhmun a Official-te chuan Lengpui leh Imphal inkarah hian thlawhna pakhat chauh a thlawh thu leh Meitei 53 an chuan thu an sawi a. Hei bakah hian Indigo Airlines thlawhna, Aizawl leh Kolkata inkarah Meitei 11 chuangin Indigo vek Aizawl leh Guwahati inkarah Meitei 14 chuangin, Thlawhna hmanga nimin a Meitei chhuak hi 78 an ni tih an sawi a. Imphal atanga Aizawl pan Alliance Air thlawk ah nimin khan Mizo 31 an lo haw bawk a ni.

Comments

Popular News (Last 30 Days)

LPG man bithliah thar