Mizoram in State University kan neih theihna turin hma kan la nghal - Dr. R. Lalthangliana

Higher & Technical Education Minister Dr. R. Lalthangliana chuan National Education Policy, 2020 leh RUSA 3.0 in a phut angin State University kan neih theihna turin hma an la nghal tih a sawi.

Govt. J. Thankima College (GJTC), Aizawl in NAAC Accreditation A+ Grade an hmuh lawmna inkhawm nimin-a Aizawl Vanapa Hall-a an buatsaih a hmanpuina ah H&TE Minister Dr. R. Lalthangliana chuan Rashtriya Uchchatar Shiksha Abhiyan (RUSA) 3.0 leh National Education Policy (NEP), 2020 hnuaia Mizoram chunga College hrang hrang ten hamthatna an dawn theihte chu State University hnuaia awm an nih loh chuan an dawng thei tawh dawn lo tih sawiin, hemi tur hian hma an la nghal tih a sawi a, “Nimin lamah pawh Mizoram University-ah mithiamten sawihona hun hmangin an zirchiang a, tun sawrkar kal lai mek hian thla tam hun a neih tawh loh avangin thui tak a kal theih hmel loh a, amaherawhchu State University nei tur hian hma kan la nghal a ni,” a ti.

Dr. R. Lalthangliana chuan GJTC in NAAC Assessment 'Grade C' atanga 'Grade A+' an hmu chu hlawhtlinna ropui tak, awlsam taka chan mai theih a ni lo tih sawiin, Grade hrang hrang 4 zuan khum thei khawpa hma an sawnna leh an tumruhna chu a chhuanawm takzet tih a sawi a, Mizoram tihmelthatu an ni tih sawiin, Grade A++ hmu thei tura tun atanga tan la tura fuihin theihtawp a chhuahpui tur thu a sawi bawk a ni.

Govt. J. Thankima College hian NAAC Assessment vawi 3 a hmachhawn tawh a, 1st Cycle (2007) khan 'C++' Grade hmuin 2nd Cycle (2016) khan 'C Grade' an lo hmu tawh bawk a ni. A vawi thumna 3rd Cycle hi December ni 15-16, 2022 khan hmachhawnin 'A+ Grade' hmuin CGPA -3.37 an hmu phak a, hei hi Mizoram sawrkar enkawl College zinga Grade sang ber a la ni rih a ni. He Accreditation hi December ni 19, 2027 thleng a nung ang a, hemi hnu hian NAAC assessment an hmachhawn leh ang.

Govt. J. Thankima College hi kum 1992 ah din a ni a. Lalhmingthanga College, Durtlang (1.4.1992 a din) leh J.Thankima College, Bawngkawn (9.9.1993) a din te chu Mizoram sawrkarin College pakhatah chhunfinin November ni 11, 2002 khan Deficit-ah a hlangkai a, a hmingah 'J. Thankima College' tih niin August 14, 2007-ah Mizoram University hnuaiah Permanent Affiliation hmuin 'Govt. J. Thankima College' tih a ni ta a ni. GJTC hian Campus hmun thumah a nei a, Under Graduate Arts Subject 7 leh Management (BBA) te a zir theih a. Mahni a in tumchawpin (self financing) Management Department hi kum 2018 atangin kalpui a ni a, Geography Department hi kum 2020 atangin kalpui a ni bawk. Zirlai mipa leh hmeichhia tan Hostel a hran ve ve in an nei bawk a. College Library pawh Mizoram a College zingah E-Resource Centre nei awmchhun an ni bawk.

Comments

Popular News (Last 30 Days)

LPG man bithliah thar