Governor in PUC-ah hmanpui

Pachhunga University College in kumin-a an zirlai thar te lawmna leh zirlai tithate chawi-mawina hun nimin-a an buatsaih chu Governor Dr. Hari Babu Kambhampati chuan khuallian niin a hmanpui.

PUC Auditorium-a Freshers’ Social leh Felicitation Programme-ah hian Governor chuan Pachhunga University College chu NIRF Ranked-ah 34-na a nih thu leh an hlawhtlinna ah a lawmpui thu sawiin, India Hmarchhak-a College tha berah chhal theih an ni mek tih a sawi a. Zirlai lut thar te chu College tha takah an luh theih avanga lawmpuiin tum nei a, an thil tum tihlawhtling tura suangtuahna nung nei turin a fuih a. Zirlai chhuak ta te leh chawimawina dawngtute pawh lawm-puiin hmabak eng tak an nei thu leh Mizoram leh India tana tih theih an neih thu te a hrilh bawk a ni.

Governor chuan Mizo thalaite chu Sap tawng thiamsa an nih avangin midang te aiin hlawhtlin theihna an nei tha hle nia a hriat thu a sawi a.Ram hmasawnna atan thil tul te ngaihtuah thiam tura fuihin, Mizoram-ah hmasawnna lian tham tak tak thil pahnih – Railway line leh KMM-TTP avangin a lo thleng thuai dawn tih a sawi a. Mizo thalaite chu heng hmasawnna ruhrelin a rawn ken tur kawng tam takah dinhmun pawi-mawh chelhtu, thawktu leh neitu ni tura lo inpuah-chah lawk nachang hre turin a chah bawk.

He hunah hian khual zahawm Mizoram University Vice Chancellor Prof. Dibakar Chandra Deka pawhin thu sawiin, PUC Principal, Prof. H. Lalthanzara chuan inlawmna thu a sawi bawk a. He hunah hian MZU Under-Graduate Examination 2023 a Department tina Top 10 te hnenah chawimawina Certificate leh pawisa fai hlanin Stream hrang hranga titha berte hnenah ‘Proficiency Award’ hlan an ni bawk. PUC-ah hian tun dinhmun ah UG Course hrang hrang 23 leh PG Course 5 zir theih a. Zirlai 3227 awmin kumin ah lut thar 935 an awm tawh a ni.