MP in Manipur chungchang sawiho phutna thlen

Mizoram Rajya Sabha MP K.Vanlalvena chuan Manipur buaina leh thil thleng chungchang sawihona karleh Thawhtanni-a Parliament a neih phutna Rajya Sabha Chairman hnenah a thlen.

Niminpiah atang khan Parliament Fur thutkhawm chu neih tan niin Mizoram Rajya Sabha MP K. Vanlalvena hian nimin khan Rajya Sabha Chairman Jagdeep Dhankar hnenah Parliament dan hman mek, Rule 267 tlawhchhanin Parliament Session kal lai titawp a, Manipur buaina leh thil thleng chungchang sawihona hun karleh Thawhtanni, July 24, 2023-a hawn a phut thu ziakin a thlen a. Manipur-a chi leh chi inkara buaina avang hian mi 140 aia tam an boral tawhin mi tam takin hliam an tuar thu leh thenawm ram hmundang ah mi sing nga chuang an tlanchhe tawh nia tarlangin, In sang nga chuang hal tawh a nih thu te, Biak In zathum chuang tihchhiat leh hal a nih thu leh Mizo hnahthlak hmeichhia leh naupangte pawngsual leh nghaisak an ni tih te a thu thlen ah hian a tarlang bawk a ni.

Manipur thil thleng sawiho phut hian eptu party MP engemaw zatin Session tan ni, niminpiah atangin Parliament House-ah bengchheng an siam a. Thurel mumal awm lovin thutkhawm hi neih niin a ni hnihna, nimin-ah pawh Manipur buaina avang tho hian rorel a kaltluang thei lo a ni.

Parliment thutkhawm tluang lo karah hian DoNER Minister leh Commerce and Industry Minister te chuan Rajya Sabha MP K. Vanlalvena zawhna ziaka chhangin Mizoram chhimlam kawtchhuah thar tur KMMTTP Road chu July 2025-ah hawn beisei a nih thu leh Kawrpuichhuah Border Trade Centre dinna tur DPR chu Bangladesh lamin a tih ve tur a peih hunah zawh a nih tur thu an sawi a. Sangau - Saisihchhuah kawng laih tura ruahman sa thawk lova cancel tak chu Committee in a ngaihtuah that leh tur thu an hrilh bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man