PWD Serchhip in khawpui chhung kawng siamna sum nuai 135.09 an hmuh hmangin hna 12 an thawk

Sawrkar kum liamta (2022-2023) chhung khan PWD Serchhip Division chuan Serchhip khawpui chhung kawngpui siamna atan cheng nuai 135.09 hmuin heng hmang hian hmun 12-ah kawngpui siamthat hna hi thawh a ni.
RTI Dan hmanga LENKAWL in PWD Serchhip Division-a zawhna a siam SPIO in a chhanna atanga a lan danin sawrkar kum liamta, 2022-2023 Financial Year chhung khan PWD Serchhip Division chuan Serchhip khawpui chhunga Internal Road siamthatna atan cheng nuai 135.09 hmuin heng te hi Maintenance Action Plan atangin cheng nuai 47.52 te; SEDP atangin cheng nuai 59.32 leh SASCI atangin cheng nuai 28.25 te a ni a. Maintenance Action Plan leh SEDP hi State Fund atanga sum hmuh niin SASCI hi Central sum Loan-a hmuh a ni thung.

RTI hmanga zawhna chhanna atanga a lan danin Maintenance Action Plan atanga sum hmuh cheng nuai 47.52 hmang hian hna pathum (3) thawh niin heng te hi Darnam Tlang atanga Darnam kawr kawngpui siamna leh DTO Office kawt tual siamna te niin hei hi a vaiin meter 750 anga chhinchhiah a ni a. DRO Office Junction atanga tanin IOC Veng atanga Treasury Road siam ni bawkin hei hi meter 850 a ni thung a, PWD Complex-II, New Serchhip-ah PWD Office leh EE Quarters panna kawng siam ni bawkin hei hi meter 400-a thui a ni bawk.

SEDP atanga sum hmuh cheng nuai 59.32 hmang hian hna panga (5) thawh niin heng te hi meter 130-a thui Field Veng Thlanmual kawng te; Meter 244-a thui PWD Complex panna kawng leh SDO Quarters kawtzawl te; Meter 1320-a thui DIET Complex kaltlanga AOC Veng leh Thumbawk inkar kawng te; Meter 300-a thui Marian H/S panna kawng leh meter 330-a thui Tourist Approach Road leh a kawtzawl te a ni. SASCI atanga sum hmuh cheng nuai 28.25 hmang hian hna pali (4) thawh ni bawkin heng te hi meter 140-a thui New Serchhip-a Mizofed panna kawng te; Meter 360-a thui Serchhip P&E Veng-a Sangvunga In leh K. Lalthlana (L) In inkar te; Meter 660-a thui Zion Veng atanga Hmar Veng Biak In kaltlanga NH. 54 kawngpui pawhna kawng leh Meter 100-a thui Bazar leh Zarmawia In inkar te a ni. Heng hna hrang hrangte hi Maintenance a nih avangin Departmental-a thawh a ni.

Kum 2023-2024 Financial Year atan khawpui chhung kawngpui siamthatna tur sum hmuh ala awm loh thu SPIO chuan tarlangin, kum 2023-2024 Financial Year-ah hian khawpui chhung kawngpui siamthat tur ruahman sa pali (4) a awm thu a tarlang a. Heng te hi Bazar atanga Vengchung panna kawng te, DC Office panna kawng leh kawtzawl te, New Serchhip-a Town Hall panna leh a kawtzawl bakah Dinthar Presbyterian Biak In panna kawng te a ni.